Sýretti túsirgen – Erlan OMAR, «EQ»
Astana qalalyq bilim basqarmasynyń habarlaýynsha, bul bastama el Prezıdenti Qasym-Jomart Toqaevtyń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasyn iske asyrý maqsatynda qolǵa alynǵan. Ata-analar jaǵymdy jańalyqty qýanyshpen qabyldady.
– Kópbalaly otbasynyń ul-qyzdary balabaqshaǵa tegin barady, olardyń tamaǵyn memleket tólep beredi degendi estip qýanyp jatyrmyz. Shyny kerek, 21 myń teńge keı otbasynyń qaltasyna aıtarlyqtaı salmaq túsiredi. Ony tóleýge qınalatyndyqtan, kezegi kelip turǵan balasyn balabaqshaǵa amalsyz apara almaı otyrǵandardy da kórip júrmiz. О́ıtkeni balanyń tamaǵynan bólek basqa da qajettiligine qarajat kerek. Onyń ústine keıde bir úıden 2-3 bala balabaqshaǵa barýy múmkin. Mundaıda ata-analardyń shyǵyny tipti kóbeıedi. Bul otbasylyq bıýdjetke ájeptáýir salmaq. Al usynylyp otyrǵan qamqorlyq – kóp balaly, jaǵdaıy tómen otbasylarǵa aıtarlyqtaı kómek. Endi osy kómekti alý úshin ne isteý kerek? Qalaı áreket etý qajet? Bul joba qashanǵa deıin jalǵasady? Qujattardy qabyldaýdyń arnaıy ýaqyty belgilengen be? Osy suraqtarǵa jaýap tappaı eleńdep jatqan jaıymyz bar, – deıdi Erkebulan.
Astana qalalyq bilim basqarmasynyń basshysy Qasymhan Senǵazyev bastamanyń jaı-japsaryn túsindirip berdi.
– Astana qalasy ákimdiginiń 2023 jylǵy 12 shildedegi qaýlysy negizinde osy aıdan bastap mektepke deıingi tárbıe men oqytýǵa arnalǵan memlekettik bilim berý tapsyrysy ornalastyrylǵan mektepke deıingi bilim berý uıymdaryndaǵy 6 myńnan astam tárbıelenýshi tegin tamaqtanady. Mundaı múmkindik kelesi sanattarǵa jatatyn balalarǵa beriledi: jetim balalar men ata-anasynyń qamqorlyǵynsyz qalǵan balalar, damý múmkindikteri shekteýli balalar, kópbalaly otbasynyń balalary, ataýly áleýmettik kómek alýǵa quqyǵy bar otbasynyń balalary, memlekettik ataýly áleýmettik kómek almaıtyn, biraq jan basyna shaqqandaǵy ortasha tabysy eń tómengi kúnkóris deńgeıinen tómen otbasynyń balalary. Qazirgi tańda balabaqshalardan 6 409 ótinish kelip tústi, – dedi Qasymhan Senǵazyev.
Bilim basqarmasynyń aqparatyna súıensek, ata-ana mektepke deıingi uıymdarǵa jáne tolyq kún bolatyn shaǵyn ortalyqtarǵa baratyn balasynyń tamaǵyna aı saıyn 20 800 teńge tóleýge tıis. Endi joǵarydaǵy sanatqa jatatyn balalardyń ata-analary bul tólemnen bosatylady.
– Joba 2023 jylǵy 1 qyrkúıekten bastap kúshine endi jáne 2026 jylǵy 31 jeltoqsanǵa deıin jalǵasady. Mundaı múmkindikti alý úshin tıisti sanattarǵa jatatyn ata-analar balasy (memlekettik bilim berý tapsyrysy ornalastyrylǵan mektepke deıingi bilim berý uıymdaryna, tolyq kún bolatyn shaǵyn ortalyqtarǵa) baratyn balabaqshanyń ákimshiligine júginip, ótinish jazýy kerek. О́tinish jazyp, kómek alýdyń naqty, ıaǵnı shekteýli ýaqyty joq. Kez kelgen kúni jumys ýaqytynda barsa, qabyldaı beredi, – dep naqtylady basqarma basshysy.
Elordadaǵy 300 balaǵa laıyqtalǵan №98 «Mıras» balabaqshasynyń janynan bala sanynyń kóptigine baılanysty tolyq kún bolatyn shaǵyn ortalyq ashylǵan. Osy balabaqsha men ortalyqtan 84 bala atalǵan kómekke iligip otyr. Mektepke deıingi uıym basshysy Almagúl Jetkergenqyzynyń aıtýynsha, mundaı balalardyń sany áli de artady. О́ıtkeni mektepke deıingi uıym ákimshiligi tek bir ǵana sanat boıynsha qujat jınap úlgergen.
– Búginde balabaqshadaǵy 300, shaǵyn ortalyqtan 100 balaǵa tárbıe men bilim berip otyrmyz. 400 tárbıelenýshiden kópbalaly otbasynyń 84 balasy endi balabaqshaǵa tegin keledi. Ata-analarǵa osyndaı jańalyqty jetkizip, qujatyn suratqanda balasha qýanǵanyn kórdik. Naryqtyq zamanda 21 myń teńge qomaqty qarjy bolyp kórinbeýi múmkin. Dese de mundaı qamqorlyq kóp balasy bar ata-analarǵa ájeptáýir kómek bolatyny sózsiz. Eki aptanyń ishinde kópbalaly otbasylardan qujat jınap, ótkizip úlgerdik. Endi aldaǵy ýaqytta basqa sanatqa kiretinderden jınaımyz. Sonda kómek alýshylardyń sany qazirgiden kóbeıedi. Kópbalaly otbasy ekenin anyqtaıtyn qujatty «Kaspı» qosymshasynan alý ońaı bolǵandyqtan, osy sanattan bastadyq. Endi basqa sanattar úshin qujat jınaýǵa kirisemiz, – deıdi Almagúl Jetkergenqyzy.
Eske sala keteıik, Prezıdenttiń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasynda «Qoljetimdi jáne sapaly bilim» degen bólim bar. Sol bólimde osy bir bastamaǵa qatysty: «Elimizde 6,5 mıllıon bala bar. Olardyń bárine turǵan jerine jáne qaı tilde oqıtynyna qaramastan, irgeli bilim, sıfrlyq tehnologııa, jaıly bilim ınfraqurylymy teń dárejede qoljetimdi bolýǵa tıis. Osy maqsatta áleýmettik osal top sanatyndaǵy otbasynyń balalary balabaqshada tegin tamaqtanady jáne bastaýysh synyp oqýshylarynyń barlyǵy tegin ystyq tamaqpen qamtamasyz etiledi», dep jazylǵan.
Ázirshe mundaı bastamany tek Astana qalasynyń ákimdigi ǵana qolǵa alyp otyr. Jaqsy joba ózge óńirlerde de jalǵassa, nur ústine nur bolar edi.
