7-8 qyrkúıekte Túrkistan qalasyndaǵy Túrkistan qonaqúıiniń májilis zalynda din máseleri boıynsha bilikti mamandardy daıyndaýǵa baǵyttalǵan is-shara ótti. Oǵan «Din zertteý ortalyǵynyń», «Aqnıet» QQ, meshitterdiń jáne t.b mamandary, ımamdar, psıhologtar, teologtar qatysty. Jıynda din máseleleri boıynsha túsindirý tobynyń músheleri – rıtorıka mamany Amanbek Tolqyn, «Áleýmettaný» ǵylymdarynyń kandıdaty Jaqııanov Talǵat Járdemqululy, dintanýshy, teolog Ospanov Dálelhan, dintanýshy, Nur-Múbarak Egıpet ıslam mádenıeti ýnıversıteti, dintaný kafedrasynyń dosenti, PhD Abylov Tuńǵysh Talǵatuly semınar oqydy.
Amanbek Tolqyn «Rıtorıka. Kópshilik aldynda sóıleý daǵdylaryn meńgerý» taqyrybymen qatysýshylarǵa adam boıyndaǵy jasqanshaqtyqty joıý, daýystyń yrǵaǵy, tembri, ıntonasııany durys qoldaný, ekpindi durys qoıý, durys tynys alý mańyzdylyǵyn atap ótti. Sonymen qatar «Dıksııany jaqsartýǵa arnalǵan quraldar» taqyryby aıasynda oratorlyq sheberlikti damytýǵa baǵyttalǵyn arnaıy jattyǵýlar men ádisterdi kórsetip, trenıng ótkizdi.
Jaqııanov Talǵat Járdemqululy «Zaıyrlylyq qoǵamdyq kelisim men turaqtylyqtyń negizi retinde» taqyrybynda dáris oqyp, jalpy teorııalyq aqparat berdi. Sondaı-aq «Qazaqstandaǵy dinı ahýal: negizgi máseleler men tendısııalar» taqyrybymen Qazaqstandaǵy dinı jaǵdaılardy túsindire otyra, oǵan qatysty kúrdeli suraqtarǵa jaýap berý ádisterin úıretti.
Ospanov Dálelhan «Islam álemindegi alaýyzdyqtyń sebepteri men sheshý joldary» taqyryby aıasynda qatysýshylarǵa ıslam dinindegi kúrdeli problemalar men asqynyp turǵan máselelerdi túsindirdi. Sondaı-aq ıslam áleminiń birligi jolynda turǵan negizgi kedergiler jáne onymen kúres joly jaıynda aıta ketti. Budan soń «Ońaltý jumystaryn tıimdi júrgizý joldary» taqyrybymen mamandarǵa jumys barysynda jaǵdaıdyń kúrdelenýine jol bermeý tásilderi men ońaltý qaǵıdalary týraly sóz qozǵady.
Abylov Tuńǵysh Talǵatuly «Dindarlyq áleýmettik-psıhologııalyq fenomen retinde» taqyrybynda sóz qozǵady. Ol dinı sananyń erekshelikterin, dindarlyqtyń qurylymyn, jeke tulǵanyń jáne qoǵamnyń dinı damý aıyrmashylyqtaryn túsindirdi. «Qazaqstandaǵy táńirshildik: tarıhy jáne qazirgi jaǵdaıy» taqyrybynda semınar oqyp, jalpy túrik halqynyń dinı-nanym ustanymy jáne onyń tarıhy, táńirshildik iliminiń jaǵdaıy týraly aıtty.
Sonymen qatar semınarlar men trenıngter barysynda qatysýshylar tarapynan dáriskerlerge suraqtar qoıylyp, jaýaptar alyndy.
