«Týǵan jerge týyń tik» degen sózdi súıegine sińire bilgen kásipker saparjaıdy óz qarajatyna kótergen. Kún batareıalarynan elektr qýatyn alatyn, gazben jylynatyn ekopavılonǵa 8 mıllıon teńge jumsalypty. Kásipkerdiń saparjaıdyń janynda dámhanasy, dúkeni bar. Avtobýs júrgizýshileri, jolaýshylar aýqattana alady.
– Jańadan salynǵan saparjaı oblys ákiminiń tikeleı tapsyrmasymen salynyp otyr. Osy oraıda usynysymyzdy qoldaǵan jeke kásipker Andreı Ryjenkovqa rızashylyǵymyzdy jetkizgimiz keledi. Osydan birer jyl buryn kentimizdegi marshrýttar júretin oryn jabylyp qalǵan edi. Avtobýs qyzmeti qaıta jandanǵanymen, kólik toqtaıtyn nysannyń joqtyǵy jolaýshylarǵa qolaısyzdyq týdyrǵan edi. Mine, Andreı sekildi janashyr azamattardyń qoldaýymen bul másele sheshimin taýyp otyr, – deıdi Nura aýdanynyń ákimi Baqytjan Muqanov.
Joǵaryda atap ótkenimizdeı, buryn jolaýshylar jolǵa taksı jaldap baryp, avtobýsqa minetin. Sonyń sheshim tapqanyna kent turǵyny Sáýle Qurmanova bek rıza.
– Buryn avtobýstar kenttiń ishine kirmeıtin edi. Avtobýsty dalada kútetin edik. Jazdyń kúni jaraıdy deımiz. Al qysta qıyndyq týdyratyn. Balamen júrgenderge, tipti. Mine, endi muny umytatyn boldyq. Jańa, jaıly saparjaıymyz bar. Andreı esimdi kásipkerge myń rahmet. Aýylyn oılaǵan azamattyń joly ashyq bolsyn, dep jyly lebizin jetkizdi Sáýle Seıilhanqyzy.
Jaqynda kassa jumysy iske qosylady. Munda Qaraǵandy – Ýrojaınyı (Egindi), Qaraǵandy – Nura (Osakarov arqyly), Qaınar – Izendi – Jaraspaı – Nura–Astana baǵyttary boıynsha avtobýstar toqtaıtyn bolady.
Saparjaıda bılet alatyn kassa, býfet, janynda dámhana, dúken jáne dárihana bar.
Qaraǵandy oblysy,
Nura aýdany
