Oqyrmanǵa jol tartqan jańa kitapta parasatty pýblısıstiń ómiriniń sońǵy jyldarynda merzimdi baspasózde qazaq jáne orys tilinde jaryq kórgen maqalalary, suhbattary, oı-tolǵamdary, pikirleri toptastyrylǵan. Ásirese táýelsizdigimizdiń úshinshi on jyldyǵynda oryn alǵan saıası-rýhanı máseleler týraly jazbalar kótergen júginiń aýqymdylyǵymen, tereń saraptamalyǵymen, bastysy oqyrmandy oqýǵa jetelep otyratyn kórkem tilimen baýrap áketedi. Sondaı-aq avtor adam boıyndaǵy izgilik, ıgilik, adaldyq, ar tazalyǵy, ımandylyq sııaqty qundylyqtardy qoǵammen baılanystyryp, salmaqty oı tolǵaıdy.
Mazmundy is-sharada aldymen sóz alǵan L.N.Gýmılev atyndaǵy Eýrazııa ulttyq ýnıversıtetiniń Ǵylym, kommersııalandyrý jáne ınternasıonaldandyrý jónindegi prorektory Janna Qurmanǵalıeva 2000-jyldary Kenjebolat Joldybaımen Mádenıet, aqparat jáne qoǵamdyq kelisim mınıstrliginde birge qyzmet atqarǵan jyldary jaqyn tanys bolyp, ol kisiniń adaldyqty ar tutqan ádil azamat bolǵanyn aıtty.
Odan keıin Parlament Senatynyń depýtaty, Qazaqstan Bas redaktorlar klýbynyń prezıdenti Bıbigúl Jeksenbaı belgili qalamgerdiń atalǵan klýbty basqarǵan jyldardaǵy eńbegine aıryqsha toqtaldy.
– Kenjebolat aǵamen Bas redaktorlar klýbynyń jumysy barysynda tanysyp, 2013-2014 jyldary ol kisimen belsendi jumys istedim. Kez kelgen qoǵamnyń damýyna azamattyq qoǵamnyń damýy erekshe áser etedi. Elimizdegi azamattyq ınstıtýttyń qalyptasýyna aǵamyzdyń da qosqan úlesi zor. Bas redaktorlar klýbyn basqarǵan jyldary osy baǵyttaǵy birqatar ıgilikti sharalarǵa bastamashy boldy. Sonyń ishinde buqaralyq aqparat quraldary týraly zańǵa ózgerister engizýge baılanysty ótkir pikir aıtyp, batyl oılaryn jazdy. Sonymen qatar qoǵamdaǵy ózekti máselelerdi klýb atynan bolsyn, óz atynan bolsyn tereńnen qozǵap, ony qazaq oqyrmandaryna ǵana emes, orys aýdıtorııasyna da jetkizdi, dedi senator.
Memleket jáne qoǵam qaıratkeri Muhambet Kópeev zamandasy K.Joldybaıdyń onyń Ulytaý óńiriniń ǵana emes, barsha el maqtanysh tutatyn azamat dárejesine kóterilgenin sóz etti. «Qalamgerdiń jańa kitabyn alyp, oqyp shyqtym. Munda ol ótken zaman men búgingi ýaqytty sóz etip qana qoımaı bolashaqta qandaı bolamyz degen saýaldarǵa da jaýap berýge tyrysqan. Tulǵalar týraly aıtqan oı-tolǵamdary da erekshe. Halqymyzda «Artynda balasy qalsa kózi qaldy de, sózi qalsa, ózi qaldy de», degen ǵıbratty sóz bar. Osy támsildi oıǵa alsaq, Kenjebolat ta dál búgin ortamyzda otyrǵandaı áser beredi», dedi ol.
Al akademık, «Qazaq gazetteri» seriktestiginiń dırektory Dıhan Qamzabekuly:
– Búgingi is-shara ótip otyrǵan Aqseleý Seıdimbek zalymen qatarlas Muhamedjan Qarataevtyń, Rábıǵa Syzdyqovanyń, Tursynbek Kákishevtiń, Serik Qırabaevtyń jáne taǵy basqa da tulǵalardyń eńbekteri – Eýrazııa ýnıversıteti kitaphanasynyń ustyndary sekildi. Sol qatarda marqum Kenjebolat Joldybaıdyń da buǵan deıingi jınaqtary men búgingi tusaýy kesilgen kitaby da oqyrmanǵa jetkeli otyr. Ol kisi «jaqsy adam» degen mazmundy eńbekpen jasady. Tehnar adamnyń gýmanıtarlyq salanyń júgin arqalaýy ońaı emes. Onyń boıyndaǵy zııalylyq – qasıetti Ulytaý men ata-babasynyń qanynan daryǵan dep oılaımyn. Alash ardaqtylary biri – ınjener, biri – dáriger bolsa da ult qamy úshin jan aıanbaı qyzmet istep, el rýhanııatyna ólsheýsiz eńbek sińirdi. Bul kisi de sol Alash zııalylaryna uqsap, óz mazmunyna saı eńbek etti, – dedi.
Taǵylymdy shara barysynda qalamgerdiń jańa kitabynyń tusaýy kesildi. Ulytaý oblysynyń ákimi Berik Ábdiǵalıulynyń arnaıy jibergen quttyqtaýyn Bas redaktorlar klýbynyń múshesi Qanat Áýesbaı oqyp berdi. Parlament Senatynyń depýtaty Nurtóre Júsip beınebaılanys arqyly shyǵyp, estelik aıtty. Sondaı-aq belgili ǵalymdar Serik Negımov, Qaırat Saq, qaıratker Serik Tileýbaev, qalamgerler Joltaı Álmashuly, Ákim Ysqaq, din qaıratkeri Iаhıa Ismaılov aıaýly azamattyń adamı bolmysyn eske alyp, eńbekteri týraly parasatty oı órbitti.
