Abaı atyndaǵy Qazaq ulttyq opera jáne balet teatrynyń 90 jyldyq mereıli maýsymynyń ashylýymen qatar ótken konkýrstyń áleýmettik seriktesi – «Samruk-Kazyna Trust» Áleýmettik jobalardy damytý qory ekendigin aıta ketý kerek.
Sonymen bıylǵy Bas júlde Ázirbaıjan astanasy – Bakýden kelgen Mahır Tagızadege buıyrdy. Oǵan qosa Mahır Tagızade «Qazaqstan kompozıtorlarynyń týyndysyn sheber oryndaǵany úshin» dep atalatyn arnaýly syılyqqa da ıe boldy.
Konkýrstyń qazylar alqasynyń tóraıymy, KSRO jáne Qazaqstannyń halyq ártisi, Sosıalıstik Eńbek Eri, KSRO jáne Qazaqstannyń Memlekettik syılyqtarynyń ıegeri, akademık, qazaq klassıkalyq óneriniń bulbuly Bıbigúl Tólegenova saltanatty marapattaý rásiminde: «Baıqaýymyzdyń barsha qatysýshysyn, jas ári talantty oryndaýshylardy shyn júrekten quttyqtaı otyryp, osy baıqaýǵa qoldaý bildirgen QR Mádenıet jáne aqparat mınıstrligine jáne mınıstri Aıda Balaevaǵa, Almaty ákimdigine, «Samruk-Kazyna Trust» Áleýmettik jobalardy damytý qoryna, Abaı atyndaǵy Qazaq ulttyq opera jáne balet teatryna jáne bizdiń barlyq demeýshilerimizge alǵys bildiremin! Olardyń qoldaýynyń arqasynda konkýrs oıdaǵydaı ótti.
Bıbigúl Tólegenovanyń Halyqaralyq vokalıster konkýrsy meniń jeke konkýrsym emes, bul Qazaqstan týraly, el mádenıetiniń ıgiligi. Konkýrs eń aldymen Qazaqstannyń atyn shyǵaratyn joba. Bul baıqaý Ortalyq Azııa elderindegi klassıkalyq ónerdegi jalǵyz joba bolǵandyqtan bizdiń konkýrsqa qatysý úshin alys jáne jaqyn shetelderden kóptegen talant ıeleri kelip, kásibı opera jáne konserttik kameralyq ánshiler jınalady. Bul biz úshin jetistik, qýanysh. Bıylǵy konkýrs ádettegideı joǵary deńgeıde ótti. Konkýrsta jańa esimder ataldy, klassıkalyq ónerdiń jas qarlyǵashtary qanattaryn qaqty jáne olar Bıbigúl Tólegenovanyń Halyqaralyq vokalıster konkýrstynyń laýreattary atanady. Bular – Qazaqstannyń maqtanyshy. Dál osy konkýrstyń laýreattary álemdik sahnaǵa shyǵyp, Qazaqstannan shyqqan ánshiler elimizdiń atyn shyǵarady», dedi.
Bıbigúl Tólegenovanyń HII Halyqaralyq vokalıster konkýrsynyń jeńimpazy Mahır Tagızade jýrnalısterge bergen suhbatynda: «Qýanyshym qoınyma syımaı tur, bul konkýrsqa úsh ret qatysqym kelse de sáti túspegen edi. Endi mine, qatysyp qana qoımaı, jeńimpaz atandym. Men óz elimdegi jáne basqa da kóptegen halyqaralyq konkýrstarǵa qatysqanmyn. Bul joly Almatyda, Qazaqstanda, Bıbigúl Ahmetqyzynyń Otanynda ótken baıqaýǵa qatysqanyma óte qýanyshtymyn. Qazaqstandy ekinshi úıim dep sanaımyn. Konkýrs talaby boıynsha biz qazaq romansyn oryndadyq, odan ózge ózimniń jeke qalaýym boıynsha fınalda «Abaı» operasynan arııa oryndadym. Qazaqtyń klassıkalyq shyǵarmalaryn shyrqaý janymdy rahatqa bóleıdi».
Osylaısha gala-konsertte Abaı atyndaǵy Qazaq ulttyq opera jáne balet teatrynyń sımfonııalyq orkestriniń súıemeldeýimen (dırıjeri E.Ahmedıarov) konkýrs laýreattary eń tanymal qazaq jáne sheteldik klassıkalyq ánderdi oryndady.
2001 jyldan beri ár eki jyl saıyn ótkizilip kele jatqan halyqaralyq baıqaýǵa bıyl 70-ten astam ótinish kelip tússe, onyń 66-sy qatysyp, 11 elden jas talanttar baqtaryn synady. Qazaqstannyń, Reseı, QHR, Chehııa, Lıýksembýrg, Italııadan álemdik opera óneriniń maıtalmandarynan quralǵanjoǵary deńgeıdegi kásibı halyqaralyq qazylar alqasy qatysýshylardyń ónerine baǵa berip, úzdikterin anyqtady.
1 premııa jáne laýreat atanǵandar:
Azıza Omarova – Astana, Qazaqstan
Abylaı Beken – Astana, Qazaqstan
2 premııa jáne laýreat atanǵandar:
Nurǵalym Amanbaı – Almaty, Qazaqstan
Atash Karaev – Baký, Ázirbaıjan
Lıansze Hao – Szybo, Qytaı
3 premııa jáne laýreat atanǵandar:
Aıajan Qýanyshálıeva – Almaty, Qazaqstan
Dııar Nursultanov – Almaty, Qazaqstan
Maqsat Samatov – Almaty, Qazaqstan
Galına Solakıan – Erevan, Armenııa
Arnaıy syılyq ıegerleri:
Bıbigúl Tólegenovanyń repertýarynan Qazaqstan kompozıtorlarynyń ánderin úzdik oryndaǵany úshin marapattalǵandar:
Aıbek Haırýlla (Astana, Qazaqstan)
Márııamgúl Tólegenova atyndaǵy «Úmit» syılyǵyn ıelengender:
Joıan Iý (Qytaı)
Konkýrstyń úzdik konsertmeısteri atanǵandar:
Vıktorııa Ivanova – Reseı
Zárý Jazyqbaeva – Qazaqstan
ALMATY
