Fılm toqsanynshy jyldardaǵy eldiń enshisindegi dúnıe-múlikti talan-tarajǵa salyp, baıyǵan bir pysyqaıdyń ómirin baıandaıdy. Basty keıipkerler – bala kezden birge ósken úsh dos. Sonyń ekeýi qulaǵaly turǵan aýyldyń mádenıet úıin, ondaǵy múlikti satyp jiberedi. Keńshardyń da jumys tehnıkalaryn joq qylady. Ákkilengen álgiler jurttyń basqa da baılyǵyna kóz tige bastaıdy. Biraq Oraz esimdi dostary mundaı sharýanyń durys emes ekenin aıtyp, qarsy shyǵady. Odan qaýiptengen Asyl Orazdy uryp óltirip, máıitin órtep jiberedi. Jaýaptan qashý úshin polısııaǵa para berip, «ózine-ózi qol jumsady» degen derekti tirketedi. Marqumnyń sońynda jary men Baýyrjan esimdi jalǵyz uly qalady. Oqıǵa 1993 jyly bolǵan. Sodan beri 30 jyl ótedi. Orazdyń uly Baýyrjan eseıip, oblystyq «Saryarqa» telearnasynyń jýrnalısi bolady. Al ákesin óltirgen zalym Asyl – kásibi dóńgelegen, eldiń súıiktisine aınalǵan mesenat. Marat esimdi ekinshi dostary arbaǵa tańylǵan. Ákesinen aıyrylǵan Baýyrjan 30 jyldan keıin kek alýǵa bel býady. Arnaıy «Betpe-bet» baǵdarlamasyna shaqyryp, kórermenniń kózinshe qylmysyn áshkere qylady.
Rejısser «О́mir degen – býmerang, jasaǵanyńnyń bári aldyńa keledi», degendi aıtady.
– Bul fılmniń ssenarııi el tarıhymen tyǵyz baılanysty. О́mirden alynǵan shynaıy týyndy. Egemendiktiń alǵashqy jyldarynda halqymyz talaı qıyndyqty kórdi. Al pysyqaı, zalymdar urlyq jasap, aram jolmen baıydy. Men sol kezeńdegi turmysty, jaǵdaıdy jetkizgim keldi. Fılm óz deńgeıinde dep oılaımyn, – deıdi Q.Igen.
Aslannyń rólinde – Mádenıet qaıratkeri, «Eren eńbegi úshin» medaliniń ıegeri Meken Qısyqov. Al arbaǵa tańylǵan Marattyń rólinde – Qazaqstannyń eńbek sińirgen ártisi, Memlekettik syılyqtyń laýreaty Keńes Jumabekov. Orazdyń uly, «Betpe-bet» baǵdarlamasynyń júrgizýshisi – Sáken teatrynyń akteri Baýyrjan Nurmaǵanbetov.
«Betpe-bet» fılmin túsirýge eki jarym aı ýaqyt ketken. Bar bolǵany 1 mln teńge jumsalypty. Túsirilimge qajetti tehnıkalar, operatorlar taýyp berip, tipti akterlermen oblystyq «Saryarqa» telearnasy qoldaý bildirgen.
Bul rejısser Qarshyǵa Igenniń alǵashqy kınotýyndysy emes. Osyǵan deıin rejısserdiń «Bloger kelin», «Adasqan áıel», «Qara pıma», «Tuzaq», «Habarlama» degen fılmderi jaryqqa shyqqan.
Qaraǵandy oblysy
