«Qasym-Jomart Toqaev BUU-da sóılegen sózinde birinshi kezekte Ortalyq Azııanyń óńirlik problemalaryna nazar aýdaryp, naqty sharalar qabyldaý qajettigi mańyzdy ekenin atap kórsetti.
Jahandyq máseleler bizdi de alańdatatynyn sezdirý mańyzdy, bizdiń de ózindik ustanym, kózqarasymyz bar. Prezıdent ekologııalyq apatqa ushyraǵan Araldyń ǵalamdyq máselesin Qazaqstan ne bolmasa Ortalyq Azııanyń ózge elderi de sheshe almaıtynyn aıtty. Kaspıı teńiziniń taǵdyry da alǵash ret álem aldynda pikirtalas talqysyna usynyldy. Jer júzi bul ólkeni buǵan deıin munaı kózi sarqylmaıtyn «ekinshi Parsy shyǵanaǵy» dep túsinip keldi. Biraq álem Kaspııdi apatqa ushyratpaýdyń nátıjesinde qurlyqtyń basqa da ekologııalyq máselesin sheshýge bolatynyn uǵynatyn shaq qazir. Bul jerde eń aldymen transshekaralyq ózender men sý resýrstaryn qysqartýdaǵy máselelerdi sheshý mańyzdy. Biz úshin asa mańyzdy, kúrmeýli máseleniń biri – transkaspıı óńirin damytýdyń kenjelep turǵany. Muny da bir memlekettiń arqalaýyna aýyr soǵady. Barlyq tarap kelise otyryp qolǵa alý mańyzdy. Logıstıkalyq tasymaldaǵy júıesizdikten de ekologııa zardap shegip, elderdiń ekonomıkalyq áleýetine kesirin tıgizedi.
Prezıdenttiń AQSh-qa saparynyń úshinshi qyry - bul Ortalyq Azııa men AQSh elderi kóshbasshylarynyń sammıti. Buryn mundaı formatta jıyn bolǵan emes. Aqúı men Ortalyq Azııa elderi dál keshegi sammıttegideı yntymaqtastyq pen ózara tıimdi kelisimge keledi degen úmit te bulyńǵyr edi.
Bul mańyzdy kezdesýdiń nátıjelerin biz elimizdiń jaqyn aradaǵy ınvestısııalyq, ınfraqurylymdyq, tehnologııalyq jáne logıstıkalyq jobalar júzege asqanda kóretin bolamyz. AQSh-pen aýqymdy ekonomıkalyq yntymaqtastyq - bul Qazaqstan ustanatyn kópvektorly saıasattyń kemshin soǵyp turǵan órisi edi. Endi bul baǵyt ta qarqyndy damýy tıis», dedi saıasattanýshy.
