Sýretterdi túsirgen – avtor
Kesheli-búgin áleýmettik jeliler men aqparattyq saıttarda «Shańyraq» mektebi jabyldy» degendeı alypqashpa aqparat tarady. Aqparattyń shyndyqqa janaspaıtyndyǵyn Rıdder qalasynyń belsendi azamattary da rastap otyr. Al Shyǵys Qazaqstan oblystyq bilim basqarmasynyń basshysy I.Chernysheva jóndeý jumystary tolyq aıaqtalǵanyn aıtty. Tek azdy-kópti qosymsha qajettilik bar kórinedi. Aıta ketsek, naýryz aıynda oblystyq bıýdjetten 50 mln teńge qarjy bólinip, mektep ǵımaratyna japsarlas salynǵan shaǵyn sport zaly buzyldy. Sebebi ol apattyq jaǵdaıda turǵan. Sonymen qatar mektep mańaıy abattandyrylyp, qazirgi sport zaldyń esik-terezeleri aýystyryldy.
– Bıylǵy oqý jylynda birde-bir mektep jabylǵan joq. Sonyń ishinde «Shańyraq» mektep-gımnazııasy da bilim berý jumysyn jalǵastyryp jatyr. Tek ǵımaratqa kúrdeli jóndeý jumystary júrgiziletindikten, oqýshylar basqa mektepke kóshirildi. Ol úshin jobalyq smetalyq qujat daıyndalyp jatyr, – dedi basqarma basshysy.
Sondaı-aq Inessa Chernysheva «Jaıly mektep» baǵdarlamasy aıasynda qurylysy bastalǵan 600 oryndyq mekteptiń qazaq balalarynyń ıgiligine beriletinin aıtyp qýantty. Demek, qurylys sozbalańǵa salynbaı ýaqytyly aıaqtalsa, 2024 jyly «Shańyraq» qazaq orta mektep-gımnazııasy jańa mektepke kóshýi bek múmkin. Al eski ǵımaratta kúrdeli jóndeý jumystary qashan bastalyp, qashan aıaqtalary belgisiz. «Shańyraq» mektep-gımnazııasynyń dırektory da beıhabar ekenin aıtty. Eń bastysy, oqýshylar №11 jańa mektepte túske deıin bilim alyp júr.
– «Shańyraq» mektebine bólingen 50 mln teńgege apattyq jaǵdaıda turǵan shaǵyn sport zaldy buzdyq. Bastaýysh synyp oqıtyn korpýstyń jylý júıesin, terezelerin aýystyrdyq. Edenin qaıta tarttyq. Endi jalpy mekteptiń ǵımaraty kúrdeli jóndeýden ótedi. Jobalyq qujattary qashan jasalady, habarym joq, – deıdi atalǵan bilim mekemesiniń dırektory Laýra Abraımova.
«Shańyraq» mektebiniń eski ǵımaratyn altynmen aptap, kúmispen qaptasa da, tıptik mektep bola almaıdy. Sol úshin de Shyǵys Qazaqstan oblystyq bilim basqarmasynyń basshysy aıtqandaı, jańadan boı kóteretin «Jaıly mektep» qazaq mektebine berilýge tıis. Ata-analardyń da arman-tilegi sol.
– Qazaq balalaryna janymyz ashyǵandyqtan, Astanaǵa arnaıy baryp, Oqý-aǵartý mınıstrligine, Prezıdent ákimshiligine, «Amanat» partııasyna jáne Bas prokýratýraǵa kirip, aryz-armanymyzdy aıttyq, túsindirdik. Qazaq balalaryna jaıly qazaq mektebi kerek dep máseleni ortaǵa saldyq. Bári bir aýyzdan qoldady. Bilim mınıstrliginiń ókilderi «Jaıly mektep» baǵdarlamasy aıasynda salynyp jatqan mektepti 2024 jyly qazaq mektebine berýge yqpal etetindikterin jetkizdi. Qazir «Shańyraq» mektebiniń oqýshylary №11 mektepte bilim alyp jatyr. Eshkim eshkimdi qýǵan joq. Bári oıdaǵydaı, – deıdi qoǵam belsendisi Quralaı Sadyqova.
«Jaıly mektep» baǵdarlamasy aıasynda qalanyń ortalyǵyndaǵy 600 oryndyq mekteptiń «Samuryq Qazyna» qorynyń qoldaýymen qurylysy bastaldy. Aıaqtalý merzimi – 2024 jyldyń jeltoqsany. Basshylardyń aıtqany ras bolsa, kelesi jyly qazaq mektebiniń oqýshylary ondaǵan jyl armandaǵan jańa da jaıly mektepke kiredi.
Shyǵys Qazaqstan oblysy,
Rıdder qalasy
