Jalpaq jurtqa jaqsy qyrynan ónege etýge ábden laıyqty eńbek shejiresiniń álippesi sonaý 1968 jyldan bastaý alady eken. Ol tusta qurqyltaıdyń uıasyndaı jyp-jyly, shaǵyn ǵana Stepnogor qalasynyń endi ǵana tynysyn keńeıtip, órken jaıyp kele jatqan ýaqyty. Valerıı Ivanovıch pen Lıdııa Mıhaılovna Goncharıkterdiń jas otbasy ózderiniń baqytyn izdep jańa qalaǵa kelgen. Birden Selınnyı taý-hımııa kombınatyna jumysqa ornalasty. О́z isterin berilip isteıtin, tapsyrylǵan jumysty tap-tuınaqtaı etip atqaratyn jastardyń tyńǵylyqty isi nazarǵa ilinbeı qalǵan joq. Aldynan jumys úrkip otyratyn olardyń eńbegi sol tusta laıyqty baǵalandy.
– Meniń naǵashy atam Valerıı Mıhaılovıch Eremın de elge eńbegimen tanylǵan, óz isine asqan jaýapkershilikpen qaraıtyn adam edi. Atam jaǵynan da, anam jaǵynan da tutas áýletimiz osy kombınatta jumys istedi. Bizdiń áýlettiń eńbekpen kelgen berekesine kombınattaǵylar qyzyǵa qaraıtyn. Eńbek ár ýaqytta baǵalanady emes pe? Kombınatta uıymdastyrylatyn eńbek jarystarynda únemi joǵary kórsetkishterimen tanylǵandyqtan 1974 jyly «Qurmet belgisi» ordenine ıe boldy, – deıdi Evgenıı Olegovıch.
Áriptesteri ózderimen ıyq tirestire jumys isteıtin Valerıı Mıhaılovıch keýdesine taqqan marapattaryn ózderi alǵandaı qýanǵan. Ábden laıyq desken olar. Eńbegi ábden sińip júr ǵoı. О́zgeler jınalys saıyn maqtalatyn, mereke saıyn eńbegi atalyp ótetin Valerıı Eremınniń taý qoparyp, tas jaratyn qajyr-qaıratyna súısinip, ózderi de dál solaı eńbek etip ıyq tirestirip júrýdi maqsat tutatyny bar edi. 1981 jyly «Eńbek Qyzyl Tý» ordenin, 1990 jyly «Eńbek ardageri» medalin alǵanda da eńbekqor jannyń jan dúnıesin, jumysqa degen qushtarlyǵyn, mol jaýapkershiligin etene jaqyn tanyp-bilgen kóztanystar marapat ıesimen birge qýanǵan. Memleket tarapynan kórsetilgen mundaı qurmetke ıe bolý da ońaı-ospaq sharýa emes.
Tomsk polıtehnıkalyq ınstıtýtynyń 1974 jylǵy túlegi Valerıı Nıkolaevıch Eremın joldama boıynsha Selınnyı taý-hımııa kombınatynda eńbek jolyn bastaǵannan keıin taban aýdarmastan 42 jyl boıy jumys istep, zeınet demalysyna shyqty. Eńbek shejiresi keıingi jastarǵa ómirsheń ónege bolyp qaldy. Ádemi eńbek dástúri urpaqtan-urpaqqa kóship, eńbeksúıgish, tyndyrymdy jannyń qol jetkizgen tabysy, ujymnyń uıytqysyna aınalǵan berekeli is-áreketi ádemi ańyz tárizdi áli kúnge deıin aıtylady. Valerıı Nıkolaevıchtiń qyzy men Valerıı Ivanovıchtiń uly shańyraq kótergen. Osy bir jas otaýdyń keregesin keńeıtip, irgesin bekitkende arydan jylǵa tartqan eńbek lebi. Ekeýi de eńbekqor otbasynda ósip, ata-analarynyń adal jumys isteýiniń arqasynda qanshalyqty qurmetke bólengendikterin júrekterimen sezip ósti. О́zderi de solarǵa uqsaýǵa, boı túzeýge tyrysty. Álde bul ana sútimen kókirekterine daryǵan qasıet pe eken. Jas shańyraqtardyń óz perzentteri de ósip jetilgen. Qazir qyzdary Natalıa osy kásiporynda sapany baqylaý qyzmetiniń baqylaýshysy. Oleg Valerevıch ekstraksııa sehynda jumys isteıdi.
Bar ǵumyryn adal eńbekpen baıandy etken áýlettiń jańa shejiresi jazylyp jatyr. Úshinshi urpaqtyń kógerip-kókteýi, órken jaıýy. «Ata kórgen oq jonar» degendeı, atasynan, ákesinen úlgi alǵan Evgenıı Olegovıch Goncharık 2017 jyldan beri «SGHK» seriktestiginde gıdrometallýrg bolyp jumys isteıdi. О́ndiristen qol úzbeı Omby qalasyndaǵy memlekettik polıtehnıkalyq ınstıtýtty oqyp bitirdi. 2021 jyly óndiris sheberi bolyp taǵaıyndaldy.
– Bizdiń áýlettiń bári eńbekten baqytyn tapqan jandar, – deıdi Evgenıı Olegovıch. Búgingi jastar tehnıka tilin bilgeni jón. Elimizdiń bolashaǵy tehnıkalyq mamandarda ekenin Memleket basshysy Qasym-Jomart Toqaev jıi aıtady. Sondyqtan jer-jerdegi kásibı bilim berý mekemelerindegi sapany arttyrý kerek. О́ndiris oryndary kóp shoǵyrlanǵan Stepnogor qalasynda bos turǵan jumys orny kóp. Men keıde qareketsiz qarap júrgenderdi kórgende zamandastaryma tehnıkalyq bilim alsańdar, jerde qalmaısyńdar ári Otanymyzǵa da paıdalaryń tıedi, dep aıtyp júremin.
Eńbekpen kógergen áýlettiń eńbek shejiresi – shynynda da mazmundy ári baı. Oǵan mazmun ústep turǵan keıipkerimizdiń boıyndaǵy eńbekke degen umtylys.
Stepnogor qalasy
