AIMAQTYQ YNTYMAQTASTYQTY DAMYTÝ JOLYNDA

Qazaqstan Respýblıkasynyń Reseı Federasııasyndaǵy Tótenshe jáne ókiletti elshisi Zaýytbek Turysbekov jaqynda Ýdmýrt Respýblıkasynda boldy, dep habarlady elimizdiń Máskeýdegi elshiliginiń baspasóz qyzmeti. Kezdesý barysynda elshi Ýdmýrt Respýblıkasynyń prezı­denti A.Volkovpen kezdesip, eki­jaqty saýda-ekonomıkalyq jáne mádenı-gýmanıtarlyq qarym-qatynastardy odan ári tereńdetý máselelerin talqylady. Taraptar yntymaqtastyqtyń perspek­tıvaly baǵyttary dep avtomobıl ja­saý, avıaqurylys, munaı-hımııa, keme jasaý salalaryn atap ótti. Bul Z.Turysbekovtiń Volga boıy federaldyq okrýginiń áleýetimen jaqynnan tanysý maqsatymen osy aımaqty aralaýǵa baǵyttalǵan saparynyń basy edi. Ústimizdegi jyldyń kúzinde Astanada Qazaqstan men Volga boıy federaldyq okrýgi bıznes ókilderiniń bıznes-forýmy bolýy da múmkin. Kezdesý barysynda elshi osy máselelerdi de aıtyp ótti. Son­daı-aq Qazaqstan elshisi plas­tmassa zaýyty, Ijevsk mehanı­kalyq zaýyty, “Sarapýl-moloko” AAQ, “Svety Ýdmýrtıı” AAQ sııaqty jetekshi kásiporyndarda boldy. Elshi Ijevskide konstrýk­tor M.Kalashnıkovpen de kezdesti. Dańqty konstrýktor Qazaqstan jáıli jyly pikirler bildirip, óziniń 2003 jyly Prezıdent N.Nazarbaevtyń qolynan I dá­rejeli “Dostyq” ordenin alǵanyn maqtanyshpen málimdedi.