Qazaqtyń ulttyq qundylyǵyn tanytatyn dástúrli ándi dáripteıtin bul mádenı is-sharany Abaı oblystyq mádenıet, tilderdi damytý jáne arhıv isi basqarmasy uıymdastyryp otyr.
Qazaqtyń án ónerinde qaıtalanbas órnegin qaldyrǵan ánshiniń týǵan topyraǵy Qaraǵandy oblysy, Aqtoǵaı óńiri bolǵanymen, túrli taǵdyr tolqynymen, Maqanshy óńirine saıa tapqany jaıly derekter el ishinde jıi aıtylady. Áıgili «Injý-marjan», «Qysmet», «Maqpal» sııaqty ánderimen qatar talant ıesiniń sońynda iz qaldyrǵan aqyndyq murasy da jeterlik.
«Biraz ǵumyry Qytaı jerinde ótken Áset Naımanbaıulynyń ánderin búginge jetkizýden dástúrli án ónerine qubylys ákelgen Dánesh Raqyshevtiń eńbegi zor. Onyń oryndaýy arqyly el Áset ánshiniń 14 ánin estip, tánti boldy. Qynjyltarlyǵy sol, Ásettiiń óz daýysy saqtalǵan joq. Tek onyń kózin kórgen Kenen Ázirbaevtyń ózi kýá bolǵandaǵy baǵasyna ǵana tántimiz. «Áset án salǵanda kıiz túıdiń túńligi jelpildep ketetin. Men mundaı daýysty buryn-sońdy estigen emespin» degen bir aýyz sóziniń ózinen onyń qandaı talant ıesi bolǵandyǵyn tanýǵa bolady», deıdi qazylar alqasynyń tóraǵasy N. Jampeıisov.
«Án salsań Ásetteı sal áýeletip» degendeı, Úrjar óńiriniń aspanyn dástúrli ánniń dańqyna bólegen baıqaýǵa Astana, Almaty, Ulytaý, Jambyl oblystarynan 19 ánshi baq synaý ústinde.
Qyrkúıek aıynyń 22-23-i kúnderin enshilegen dástúrli án baıqaýyna qatysýshylardyń ónerine Nurjan Jampeıisov, Ardaq Isataeva, Erlan Rysqalı, Tolǵanbaı Sembaev, Berik Omarov syndy dástúrli ánniń dúldilderi engen qazylar alqasy baǵa berip, qorytyndysyn erteńgi gala-konsertten soń jarııalaıtyn bolady.
