Bul dárigerler, muǵalimder, balabaqsha tárbıeshileri, sýretshiler, sportshylar, qutqarýshylar, órt sóndirýshiler, jýrnalıster jáne áleýmettik sala qyzmetkerleri. Jastar baǵdarlamasy boıynsha qatysýshylar úshin bastapqy jarnasy nebári 10 paıyz.
Is-sharanyń ashylýynda sóz sóılegen Almatydaǵy «Otbasy bank» fılıalynyń dırektory Danagúl Túsipova páterli bolǵan jastardy quttyqtap, bıyl Otbasy bankiniń qurylǵanyna 20 jyl tolǵanyn atap ótti.
«2003 jyly germanııalyq jınaqtaý úlgisine súıene otyryp «Turǵyn úı qurylys jınaq banki» (búginde Otbasy bank) qurylǵan bolatyn. Osy jyldar aıasynda qarjy qurylymy birneshe ret ózgeristerdi basynan ótkerdi, sonymen qatar jańa baǵdarlamalary da paıda boldy. Búginde bank salymshylarynyń sany 2,6 mln adamnan asty. Elimizdegi ıpotekanyń 70 paıyzy Otbasy bank arqyly júzege asyrylýda. Bizben birlesip jumys isteýge atsalysqan Almaty qalasynyń ákimdigin erekshe atap ótkim keledi. Ákimdik 2017 jyldan beri Almaty jastary baǵdarlamasy arqyly baspanaly bolǵysy keletin jas mamandarǵa úlken qoldaý kórsetýde. Bıyl bólingen qarajatqa almatylyq 1100 jas baspanaly bolady», dedi Danagúl Túsipova.
Atalmysh baǵdarlama arqyly óz baspanasyna qol jetkizgenderdiń arasynda medısına salasynyń qyzmetkeri kóp. Solardyń biri - Syrǵabaeva Aqsultan.
«Buǵan deıin Otbasy bankiniń turaqty salymshysy edim. Baǵdarlamaǵa qatysyp, maquldaý alǵannan keıin úı tańdaýǵa bir aıdaı ýaqytym boldy. Mine búgin 5 paıyzdyq (JTSM 5,2% bastap) mólsherlememen 8 jylǵa jeńildetilgen zaem aldym. Aı saıynǵy tólemi qaltama salmaq túsirmeıtini qýantady. Bul biz sııaqty qarapaıym eńbek adamdary úshin úlken múmkindik», dedi ol.
Jalpy 2017 jyldan beri «Almaty jastary» baǵdarlamasynyń qarjylandyrý kólemi 72,5 mlrd teńgeni qurap, onyń kómegimen 4 myńnan astam almatylyq qonys toıyn toılady.
