Aıtýly is-sharaǵa Ázerbaıjan Mádenıet mınıstri Ádil Kerımlı, Qazaqstan Respýblıkasy Prezıdentiniń keńesshisi Málik Otarbaev, Qazaqstannyń Ázerbaıjandaǵy Elshisi Álim Baıel, Ázerbaıjannyń Mıllı Májilisi Mádenıet komıtetiniń tóraıymy Ganıra Pashaeva, Ázerbaıjan Ulttyq Ǵylym akademııasynyń prezıdenti Isa Gabıbbeılı, Ázerbaıjan dıplomatııalyq akademııasynyń rektory Hafız Pashaev, Ázerbaıjan Ulttyq kitaphanasynyń dırektory Kárim Tahırov, Qazaqstan Ulttyq kitaphanasynyń dırektory Baqytjamal Ospanova, sondaı-aq Chıngız Abdýllaev, Qoıshyǵul Zarly, Baqtyǵalı Aıjigitov, Baqyt Qutpanbaev, Saıat Qamshyger, Talant Arynǵalı, Nurǵalı Oraz, Qadyrbek Qanypııauly, Tahsın Mýtallıbov, Narıman Abdýlrahmanly jáne t.b. sııaqty ǵylym, ádebıet jáne óner qaıratkerleri qatysty.
Konferensııa barysynda qatysýshylar Kemel Toqaev pen Mır Jalal Pashaevtyń ómiri men shyǵarmashylyq joly týraly baıandamalar jasap, ózara mádenı yqpaldastyq arqyly túrki halyqtaryn odan ári jaqyndastyrýdyń mańyzdylyǵy týraly pikirlerimen bólisti.
Is-shara aıasynda K.Toqaevtyń ázerbaıjan tilinde jaryq kórgen «Túnde atylǵan oq» kitaby men M.Pashaevtyń qazaq tilinde basylyp shyqqan «Taýlardyń júregi» kitabynyń tusaýy kesildi. Túrki áleminiń kórkem sóz sheberleriniń shyǵarmalar jınaǵynyń tusaýkeserimen qatar, olardyń shyǵarmashylyǵyna arnalǵan kitabı-ıllıýstrasııalyq kórme de uıymdastyryldy.
M.Otarbaev is-sharanyń ótýine baılanysty Qazaqstan Respýblıkasy Prezıdentiniń quttyqtaý hatyn oqyp, ony Ázerbaıjan tarapyna tapsyrdy. Memleket basshysynyń hatynda «Qazaq pen ázerbaıjan – ejelden týys, dos halyqtar. Baýyrlas elderdiń qarym-qatynasyn nyǵaıtýǵa Kaspıı teńizi arqyly jalǵasyp jatqan tatý kórshilik pen ekonomıkalyq yntymaqtastyq qana emes, qadirli qalamgerlerimiz ben kórnekti tulǵalarymyzdyń rýhanı baılanystary da zor septigin tıgizip keledi», delingen.
Ázerbaıjan Mádenıet mınıstri Á.Kerımlı Ázerbaıjan Ulttyq kitaphanasynyń 100-jyldyǵyn merekeleýmen qatar ótip jatqan konferensııanyń eki eldiń ádebıeti men mádenıeti úshin mańyzdylyǵyn atap ótti.
Elshi Á. Baıel óz sózinde Qazaqstannyń qashanda Ázerbaıjanmen birge bolatynyn málimdedi. Sonymen qatar, dıplomat Prezıdent Q.Toqaev pen Prezıdent I.Álıev arasyndaǵy senimdi dıalogtyń arqasynda elder arasyndaǵy jan-jaqty yntymaqtastyqtyń jańa deńgeıge shyqqandyǵyn atap ótti.
Mıllı Májilis Mádenıet komıtetiniń tóraıymy G.Pashaeva óz sózinde Qazaqstan men Ázerbaıjannyń baýyrlas halyqtary arasyndaǵy ortaq tarıhı tamyrlar, sondaı-aq eki eldiń mádenı yntymaqtastyǵy týraly aıtyp berdi. Depýtat K.Toqaevtyń ázerbaıjan tilindegi kitaby men M. Pashaevtyń qazaq tilindegi kitabynyń tusaýkeserin qazaq pen ázerbaıjan dostyǵynyń jarqyn úlgisi dep atady.
Kemel Toqaevtyń ázerbaıjan tilindegi kitabyna alǵy sóz jazǵan detektıv janrynyń sheberi Chıngız Abdýllaev Toqaev bıografııasynyń tańqalarlyq tustaryna toqtaldy.
Ulttyq Ǵylym akademııasynyń prezıdenti I. Gabıbbeılı qos jazýshy taǵdyrynyń uqsastyǵyna nazar aýdardy: ekeýi de ata-anasynan erte aırylyp, aǵalarynyń qamqorlyǵymen er jetti. Ekeýi de adamgershilik pen otanshyldyq sııaqty qundylyqtardy dáriptep, maıdangerlerdiń ómirin sýrettedi.
Konferensııa sońynda eki eldiń ulttyq kitaphanalarynyń basshylary Qazaqstannyń Ázerbaıjandaǵy Elshiligine is-sharany uıymdastyrýǵa qoldaý kórsetkeni úshin rızashylyqtaryn bildirdi, sondaı-aq qonaqtarǵa is-sharaǵa qatysqandary jáne Túrki áleminiń mádenı baılanystaryn damytýǵa qosyp otyrǵan úlesteri úshin alǵys bildirdi.
