«Klassıkter» medalsyz qaldy

Belgradta bozkilemge shyqqan Qazaq­stannyń grek-rım kúresi sheberleri tegisteı jeńilgennen keıin barsha jankúıer 32 jas­taǵy Nursultan Tursynovtyń jolyna úmit­pen qarady. 87 kılo salmaq dárejesinde beldesken qandasymyz alǵashqy aınalymdarda ıtalııalyq Mırko Mıngýssı men ońtústikkoreıalyq Sanhen Parktan basym túsip, shırek fınalda Azııanyń úsh dúrkin chempıony ırandyq Náser Álızadeni qapy qaldyrdy. Sol kezde qazaq jankúıerleri bir serpilip qaldy. Jartylaı fınalda ol bıylǵy Eýropa chempıonatynyń kúmis júl­degeri túrkııalyq Álı Shyńǵysty biraz upaı aıyrmashylyǵymen jeńip jatqan edi. Sol basymdyqty ustap qalýdyń ornyna Nursultan Álıdi kóterip alyp, qos jaýy­rynymen jerge qadaýǵa árekettendi. Asyǵys jasalǵan ádis opyq jegizdi. О́zi qarsylasynyń astyna túsip qaldy. Shyńǵys óz múmkindigin qalt jibermedi.

Nursultan qola medaldy ıelený úshin óziniń qurdasy Rıo Olımpıadasynyń kúmis júldegeri, Tokıo Olımpıadasynyń jeńimpazy, álemniń eki jáne Eýropanyń úsh dúrkin chempıony Jan Belenıýkpen aıqasty. Ýkraınanyń dańqty balýany bizdiń jigitke adym ashtyrmady. Tursynov tórttaǵanǵa túskende Belenıýk ony bozkilemde ári de, beri de shyr aınaldyryp, birden jeti upaıǵa ıelik etti. Ekinshi kezeńde jerlesimizge de sondaı múmkindik berildi. Biraq ol Jandy ornynan qozǵalta almady. Nátıjesinde, jeńis 7:1 ese­bimen ýkraınalyq sportshynyń paıdasyna sheshildi.  

Júldeden aıyrylǵannan keıin Nur­sul­tan Tursynov Olımpııa oıyndarynyń eń sońǵy lısenzııasy úshin talasty. Qandasy­myz Eýropa oıyndarynyń kúmis júldegeri, qurlyq chempıonatynda úsh ret jeńis tuǵy­ryna kóterilgen Ázerbaıjannyń myqtysy Islam Abbasovty birinshi kezeńde 8:0 esebimen oısyrata utyp, Parıjge baratyn balýandardyń tizimine 90-shy bolyp qosyldy. Sóıtip, «klassıkterimiz» jalǵyz joldamaǵa qol jetkizdi. Al kúrestiń osy túrin serik etken ózge jigitterimizden esh qaıyr bolmady.   

Grek-rım kúresinen ótken jarystyń sońǵy júldelerin myna balýandar ıelendi: 63 kılo: 1. Lerı Abýladze (Grýzııa), 2. Murad Mammadov (Ázerbaıjan), 3. Enes Bashar (Túrkııa) men Georgıı Tıbılov (Serbııa). 67 kılo: 1. Lýıs Alberto Orta Sanches (Kýba), 2. Hasrat Jafarov (Ázerbaıjan), 3. Mate Nemesh (Serbııa) pen Mohammad Reza Geraeı (Iran). 87 kılo: 1. Álı Shyńǵys (Túrkııa), 2. Devıd Losonsı (Majarstan), 3. Jan Belenıýk (Ýkraına) pen Semen Novıkov (Bolgarııa).

Jalpykomandalyq esepte Ázerbaı­jan­nyń ulttyq quramasy ozdy. Qap taýynyń bes qyrany fınalda kúresti. Solardyń ekeýi altyn jáne úsheýi kúmis medal oljalady. Ekinshi orynda – Kýbanyń qabylandary (2+0+1). Úshinshi satyǵa Qyrǵyzstannyń ór minezdi órenderi (2+0+0) jaıǵasty. Tórtinshi jáne besinshi oryndardy Iran (1+1+3) men Túrkııa quramalary (1+1+2) ıelendi. Altynshy jáne jetinshi satylarǵa Grýzııa (1+1+0) men  Fransııa (1+0+0) turaqtady. Sondaı-aq júldege qol jetkizgender qa­ta­rynda Majarstan (0+2+0), Japonııa men Armenııa (0+1+1), Serbııa (0+0+3), Ýkraına men О́zbekstan (0+0+2), Qytaı, Reseı, Chehııa, Mysyr jáne Bolgarııa (0+0+1) ókilderi
bar.