Koalısııa delegasııasyn Premer-mınıstrdiń orynbasary – Mádenıet jáne aqparat mınıstri Aıda Balaeva bastap bardy. Otyrysqay Parlament Májilisiniń depýtattary Janarbek Áshimjanov, Sergeı Ponomarev jáne basqalary qatysty. Stýdenttik qaýymdastyq atynan ýnıversıtet belsendileri men jas joba avtorlary sóz sóıledi.
Aıda Balaeva jańa Konstıtýsııa jobasy jahandyq ózgeristerdi eskerip, ıdeıalar, quzyretter men ınnovasııalar sheshýshi ról atqaratyn bilim ekonomıkasyn damytýǵa jol ashatynyn atap ótti. Onyń aıtýynsha, stýdentter men jas zertteýshiler úshin zań jobasynda shyǵarmashylyq erkindikke kepildik pen zııatkerlik menshikti qorǵaý normalarynyń bekitilýi aıryqsha mańyzdy.
«Konstıtýsııa sóz bostandyǵy men ǵylymı, tehnıkalyq, kórkem shyǵarmashylyq erkindikke kepildik beredi. Eń bastysy – zııatkerlik menshik zańmen qorǵalady. Iаǵnı, ıdeıalar, startap ónimderi, avtorlyq jobalar, zertteýler men shyǵarmashylyq nátıjeleri konstıtýsııalyq deńgeıde bekitiledi. Jastar úshin bul – abstraksııa emes, eńbekterińizdiń qorǵalatynyna jáne qundylyq retinde tanylatynyna degen senim», dedi Aıda Balaeva.
Vıse-premer bilim berýdiń mańyzyna erekshe toqtalyp, ony negizgi konstıtýsııalyq kepildik ári múmkindikter teńdiginiń irgetasy dep atady. Ol bilimge qoljetimdilik áleýmettik turaqtylyq pen adamı kapıtaldy damytýdyń basty negizi bolyp qala beretinin aıtty.
Sonymen qatar, kezdesý barysynda koalısııa músheleri azamattardyń sıfrlyq ortadaǵy quqyqtaryna nazar aýdardy. Atap aıtqanda, derbes derekterdi qorǵaý jáne sıfrlyq servısterge senimdi qalyptastyrý máseleleri talqylandy. Konstıtýsııa jobasynda derbes derekterdi zańsyz jınaýdan, óńdeýden, saqtaýdan jáne paıdalanýdan sıfrlyq tehnologııalar arqyly qorǵaý normalary bekitiletini atap ótildi. Bul jastardyń sıfrlyq bastamalarynyń qaýipsizdigi men damýyna tikeleı áser etedi.
Jalpyulttyq koalısııa múshesi, Májilis depýtaty Janarbek Áshimjanov bilim men ǵylymǵa basymdyq berý ekonomıkany jańǵyrtýdyń ári eldiń básekege qabiletin arttyrýdyń basty sharty ekenin sóz etip, bul baǵyttar Konstıtýsııada naqty ári berik bekitilýi tıis ekenin tilge tıek etti.
«Bilim óndiristi jańǵyrtýǵa, ónim sapasyn arttyrýǵa, jańa standarttardy engizýge jáne básekege qabiletti bolýǵa múmkindik beredi. Balalarǵa bilim berý quqyǵy, zamanaýı bilim alý, jastardyń suranysqa saı qabiletterdi ıgerýi – munyń bári Ata zańda berik bekitilýi tıis. Sebebi Konstıtýsııa memlekettiń zańnamalyq jáne bıýdjettik saıasatynyń irgetasyn aıqyndaıdy», dep atap ótti ol.
Kezdesý barysynda stýdentter de jańa Konstıtýsııa jobasynyń mańyzy týraly pikir bildirip, bilim, ǵylym jáne eldiń zııatkerlik áleýetin damytýdyń strategııalyq negizi retinde qabyldaıtyndaryn jetkizdi. SDU stýdenti Maqsat Aıtbek bilim men ǵylym basymdyqtaryn konstıtýsııalyq deńgeıde bekitýdi qajet dep sanaıdy.
Abzal Quspan: Konstıtýsııalyq sot azamat pen memleket arasyndaǵy tóreshi bolady
«Eger Konstıtýsııa bilim men ǵylymdy memlekettik saıasattyń tiregine aınaldyrsa, bul áleýmettik salaǵa salynǵan ınvestısııa ǵana emes, bolashaqqa baǵyttalǵan strategııalyq qadam», dedi ol.
Kezdesý sońynda Aıda Balaeva stýdenttermen jáne ýnıversıtet oqytýshylarymen áńgimelesip, Ata zańnyń bolashaǵyna qatysty sheshim qabyldaýda azamattardyń referendýmǵa tikeleı qatysýy mańyzdy ekenin jetkizdi.
