Shynymdy aıtsam, buǵan deıin men de bul sýretshiniń shyǵarmashylyǵy túgil, esimin de estigen emespin. Al ony jaqyn bilýime bir oqıǵa sebep boldy. Belgili aqyn Baıbota Qoshym-Noǵaı áleýmettik jelide ómirden ótken tulǵalardyń týǵan kúnin eske alyp, shyǵarmalary týraly az-muz derek berip otyrady. Jaqynda aqyn aǵamyz biz sóz etip otyrǵan daryn ıesiniń týǵan kúnine oraı ony eske alyp, bir top kartınasyn saldy. Qazaqy boıaýǵa baı týyndylary men tabıǵat tańǵajaıyptaryn tańǵy shyqtaı móldiretip beınelegen peızajyn kórip tańǵaldym. Kózi endi ashylǵan bulaqtan shólimdi qandyrǵandaı áser aldym.
Jambyl qalasynda ómirge kelgen sýretshi áke-sheshesinen jastaı jetim qalyp, balalar úıinde tárbıelengen. Jas kúninen beıneleý ónerine jaqyn bolyp, orta mektepti támamdaǵannan keıin, Bishkek qalasyndaǵy Kórkemsýret ýchılıshesine oqýǵa túsedi. Ony 1953 jyly oıdaǵydaı aıaqtap, Máskeýdegi I. Repın atyndaǵy keskindeme, músin jáne sáýlet ınstıtýtyna qabyldanyp, ulaǵatty ustazy I. Serebrıanov sheberhanasynda bilim alǵan. Stýdent kezinen darynymen daralanyp, kózge túsedi. Ulttyq naqyshqa toly týyndylary men qazaq jeriniń saıyn dalasy men shoqtyǵy bıik taýlaryn ásem bederlegen ǵajaıyp peızajdary talǵamy bıik ustazdary men kóziqaraqty qaýymnyń kóńilinen shyǵady. 1956 jyldan jumystary kórmege qoıyla bastaıdy. 1959 jyly KSR Sýretshiler odaǵynyń músheligine qabyldandy.
Júsipovtiń peızajdaryn kórip otyryp, onyń sheberligine, tabıǵat sulýlyǵynyń syryn uqqan janynyń náziktigine, syrshyldyǵyna qaıran qalasyz. Onyń tabıǵatty ár qyrynan bederlegen kartınalary boıaý túsiniń qanyqtyǵymen, shynaıylyǵymen erekshelenedi. Sýretshiniń portret janryndaǵy qoltańbasy da bólek. Oǵan keıipker bolǵan qarııalardyń, elge tanymal tulǵalardyń bolmysynan halqymyzǵa tán asyl qasıetterdiń barlyǵyn kezdestiresiz. Sondaı-aq natıýrmorttary men taqyryptyq keskindemeleri de kelisti órnegimen óris tapqan.
Qysqasy, qamshynyń sabyndaı qysqa ǵumyr keshse de sońyna mol mura qaldyrǵan qylqalam sheberiniń árbir týyndysy ulttyq boıaýǵa baı mazmunymen, kórkemdigimen, san túrli obrazymen, jan jadyratar sulýlyǵymen aıshyqtalyp turady. Biz osy joly sýretshiniń janymyzǵa jaqyn 1960 jyly salǵan «Alǵashqy oqý» atty kartınasyn sóz etsek deımiz. Bir qaraǵanda, bul týyndy óte qarapaıym. Qazaqy kıiz úı. Onyń irgesinde aq jaýlyq tartqan áje nemeresimen otyr. Kók maısanyń ústine jaıylǵan kilem ústinde mektepke barǵan ba, álde endi bara ma, áıteýir jas jetkinshek kitap oqyp jatyr. Ájesi men 3-4 jastaǵy taqııasyna úki taqqan nemeresi sol balanyń daýystap oqyp berip jatqanyn tyńdap otyrǵan sekildi. Kartınadaǵy bar beıne osy. Biraq...ıá, biraq osy beıneden sizdiń de aýylda ótken balalyq shaǵyńyz, sizdi jan balasyna teńgermeı erkeletip ósirgen ájeńiz eske túsip, sol kúnder endi qaıtyp kelmeıtinin bilip, keýdeńizdi óksik qysady. Bul týyndyda qazaqtyń bolmysy deısiz be, minezi deısiz be, etnografııasy deısiz be – bári de kózge badyraıyp kórinip tur. Sondyqtan eshnárse aıtqyńyz kelmeıdi Sýrettiń ózi saırap tur.
Qylqalam sheberi osy eńbegi týraly bir jazbasynda: «Bul kartınanyń astarynda eki álem men eki urpaq bar. Iаǵnı, eski men jańa dáýirdi kórsetkim keldi. Men ájeniń beınesi arqyly meıirimdilikti, izgilikti beıneledim. Ol kisi nemeresine qarap: «Bizdiń bala kúnimizde oqýǵa jaǵdaı da, múmkindik te bolmady. Endi sender jańa dáýirdiń tynysyn sezinip oqyńdar, baqytty bolyńdar» degendi meńzedim. Osy jumysymda óz oıymdy ulttyq bolmysqa toly sıpat arqyly jetkizýdi kózdedim», dep aıtypty.
Aqıqatyn aıtqanda, avtordyń negizgi kózdegen maqsaty oryndalǵan. Bul týyndy alpys jyldan assa da keshe ǵana sýretshi qylqalamynan shyqqandaı áser qaldyrady. О́nerdiń ulylyǵy da, qundylyǵy da osy bolar, sirá!
