Kókshetaý qalasynyń turǵyny Venıamın Solovevtiń ataǵy júzim ósirýmen shyqqan. О́zge de jemis-jıdekti molynan egedi. Eń basty jetistigi, ystyqty súıetin, bul ólkeniń aýa raıyna kóndige qoımaıdy delinetin júzim ósirgeli jıyrma jyl. Igilikke bógip turǵan saıajaı ıesiniń aıtýyna qaraǵanda, júzim qaıtpas qaısar jigerlige ǵana ósse kerek. Qala turǵyndary, onyń ishinde saıajaıy barlar júzim ósetin jerdi kórýge áýes. Venıamın aǵaıdyń aıtýyna qaraǵanda, júzim ósirýdiń ádis-tásilderin meńgerip, oıǵa alǵan sharýasyn iske asyrý úshin qanshama ádebıetti aqtarǵan. Alys-jaqyn jerdegi júzim egip, jerdiń júzin jylytqandarmen syrlasqan. Sóıtse, júzim ósirgen janǵa myqty shydam, eren eńbekqorlyq kerek eken. Aıtsa aıtqandaı-aý, aýyldaǵy aǵaıyn ýyljyp turǵan júzim ósirý bylaı tursyn, qara jerge kóme salsań, qaptap shyǵatyn kartop ta ege almaı otyrǵan joq pa?!
Áldeneshe ret tájirıbe jasaǵan, qatelikterin sarapqa salǵan. Aqyr sońynda taý basynan qudyq qazǵandaı qııapat eńbekpen kózdegen maqsatyna jetken. Qazir keýdesin maqtanysh kerneıdi. Bir jaqsysy, tájirıbesin jasyrmaı, jaıyp salýǵa, umtylǵan jannyń qoltyǵynan demep, kómektesýge daıyn. Alǵash ret nátıjege qol jetkizgende tóbesi kókke bir-aq eli jetpeı qalǵandaı qýanǵan. Endi qaıtsin, tabany kúrekteı jeti jylǵy eńbeginiń nátıjesi.
– Soltústik Qazaqstannyń aýa raıyna júzimniń «Izabella» dep atalatyn túri qolaıly. Bul suryp sýyqqa shydamdy. Bizdiń óńirdiń tabıǵatyna tez kóndigetin bul surypty Amerıka seleksıoneri Ýılıam Prıks shyǵarsa kerek. Tátti júzimniń ataýyn áıeliniń qurmetine Izabella dep ataǵan. Árıne, dámi jaǵynan kelgende ońtústiktiń júzimimen taıtalasa almas edi. Biraq sonyń ózinde de eńbekpen kelgen yrys bolǵandyqtan, dámi til úıiretin bolyp kórinedi», deıdi Venıamın Aleksandrovıch.
Tájirıbeli saıajaı ıesiniń aıtýyna qaraǵanda, eń aldymen egetin surypty anyqtaý kerek eken. Qazirgi kúni saıajaımen aınalysý ońaıyraq. Erte kóktemde alma, almurt tárizdi jemisterdiń tuqymy kóptep satylady. Júzim surpyn usynatyndar da tabylady. Áıtse de men ózim nátıjesin kózin kórgen kórshilerden alǵan jón dep esepteımin. О́zi de osy isin bastaǵan kezde birneshe butaq qana alǵan eken. Tórteýi ǵana tamyr jaıǵan. Sol tórt túp júzim – búginde Kókshetaýda osy jemistiń atasy atanyp otyrǵan Venıamın Aleksandrovıchtiń kórgen jannyń kózin qyzyqtyratyn baqshasynyń bastaý kózi. Júzim baǵbanynyń jary Faına Mıhaılovna – sonaý stýdenttik jyldardan beri tynymsyz eńbekti janyna serik etken Venıamın Aleksandrovıchtiń kómekshisi. Ekeýi de mańdaı terlerimen sýarylyp, jaıqalyp ósken jemis-jıdekti, ásirese gúlderdi jaqsy kóredi.
Nesi bar, ádemi áreket juǵysty bolyp, Kókshe taýlarynyń baýraıynda jaıqalyp júzim ósip tursa, bir ǵanıbet emes pe?
Kókshetaý qalasy
