Qazaqstan halyq partııasynyń Qaraǵandy oblysyndaǵy fılıaly 20 qyrkúıek kúni konferensııa ótkizgen bolatyn. Konferensııada aldaǵy ákim saılaýyna qatysty áńgime qozǵaldy. Partııa ujymy Qaraǵandynyń Osakarov jáne Aqtoǵaı aýdanynyń ákim saılaýyna óz kandıdattaryn tańdap, olardyń qujattaryn saılaý komıssııasyna usyný jóninde sheshim shyǵardy.
Beısenbi kúni partııa ujymy Osakarov aýdanynyń saılaý komıssııasyna kandıdattarynyń qujatyn ótkizdi.
– Biz partııa ujymymen keńese kele, Osakarov aýdanynyń ákimi saılaýyna óz kandıdatymyzdy usyndyq. Kandıdatymyzdyń qyryq jylǵa ýaqyt eńbek ótili bar. Aýdannyń barlyq máselesin jiti biledi, jergilikti jerdiń áleýmettik-ekonomıkalyq ahýalymen jaqsy tanys ári ony damyta alady dep senim bildirip otyrmyz. Kandıdatymyz aldaǵy ýaqytta óziniń saılaýaldy baǵdarlamasyn jarııalaıdy, – deıdi partııanyń oblystyq fılıal tóraǵasy Halel Maqsutov.
Al Aqtoǵaı aýdanynyń saılaý komıssııasyna kandıdattarynyń qujatyn keler aptada tapsyrady.
– Aýdannyń negizgi kúshi ol – aýyl. Biz Aqtoǵaı aýdanynyń ákim saılaýyna kandıdatymyzdy aýyldan tańdap otyrmyz. Aýyldyń máselesin biletin memlekettik qyzmetker aýdandy basqara alady. Aýyldy kóterý arqyly, aýdannyń ál-aýqatyn arttyrady. Aýyl sharýashylyǵy salasyn kóterse, eldiń ekonomıkasyn kóteredi, – deıdi Halel Muqataıuly.
Kandıdattary tirkeý 15 qyrkúıekte bastalyp, saılaýǵa 25 kún qalǵanda – 10 qazanda aıaqtalady. Aýdandar men oblystyq mańyzy bar qalalardyń ákimderin saılaý qarasha aıynyń birinshi jeksenbisinde, ıaǵnı 5 qarashada ótedi. Saılaý 3 qala men 42 aýdanda ótedi.
Saıası partııalardan bólek jekelegen azamattardyń da kandıdat bolýǵa múmkindigi bar. Bul rette ózin-ózi usynǵan azamat saılaýǵa túsip otyrǵan saılaý okrýginde tirkelgen saılaýshylardyń jalpy sanynyń keminde 1 paıyz qoldaýyn jınaýy qajet.
«Kandıdattar tirkelgennen keıin aýmaqtyq saılaý komıssııasy BAQ-ta kandıdatty tirkeý týraly sheshimin jarııalaıdy. Saılaýaldy úgit-nasıhat jumystary tirkeý aıaqtalǵan soń birden bastalady, ol 24 kúnge sozylady. Daýys berý úshin turǵyndar tańǵy saǵat 07.00-den 20.00-ge deıin aýmaqtyq saılaý ýchaskelerine kele alady. Daýystardy sanaý 12 saǵattan aspaýǵa tıis», dedi oblystyq saılaý komıssııasynyń tóraǵasy Qaırat Nurkenov.
Qaraǵandy oblysy
