FOTO: kokshetv.kz
Jerles jaýynger Máskeý túbindegi Polashkıno selosynda qaza tapqan eken. Lenkıı eldi mekenindegi baýyrlastar qabirinen topyraq buıyrǵan. Qan maıdanda 108-atqyshtar dıvızııasynyń 407-atqyshtar polkiniń quramynda bolǵan. 24 jasynda qan maıdanǵa attanǵan qyrshyn jaýyngerdiń artynda urpaq qalmapty. Áıtse de inisi men qaryndasynan órbigen urpaq atalarynyń qabirin taýyp, bir ýys topyraǵyn týǵan jeriniń tósine jetkizdi.
– Atamyz týraly bir derek shyǵyp qala ma dep uzaq jyl izdedik, – deıdi marqumnyń jıeni Botagóz Núrpeıisova. – «Pamıatı naroda» saıty arqyly taptyq. Odan ári qalaı áreket eterimizdi de bilmedik. Áıteýir, janashyr jandardyń arqasynda atamyz jerlengen jerge baryp, qabirine týǵan jerdiń bir ýys topyraǵyn qostyq. Ol jaqtan da bir ýys topyraq ákeldik. Endigi oıymyz, maıdangerdiń esimin jańǵyrtatyn kesh uıymdastyrsaq pa deımiz.
Qazaq gýmanıtarlyq-tehnıkalyq kolledjiniń ujymy 2018 jyly «Kókshetaý izdeý» áskerı-patrıottyq tobyn uıymdastyrǵan eken. Negizgi maqsat – Ekinshi dúnıejúzilik soǵys kezinde habar-osharsyz ketken jaýyngerlerdiń deregin tabý. Osy ýaqytqa deıin uıym tórt myńǵa jýyq jaýynger týraly derek izdep, onyń 300-den astamynyń jerlengen jerin tapqan.
– Bizdiń klýb Aqmola oblysynda tuńǵysh ret qurylǵan. Bylaıǵy jurt bizdi «Estelikter vahtasy» dep atap ketti. Kalýga, Týla tóńiregine baryp, Ýkraına, Sankt-Peterbýrg mańaıyn zerttegenbiz, – deıdi izdestirý tobynyń jetekshisi Erkinbek Abdýllın. – Erlerdiń aty ólmeı, keıingi urpaqqa erlik isteri ónege bolýy kerek. Qazaqta «О́li razy bolmaı, tiri baıymaıdy», degen sóz bar. Bul – keıingilerdiń paryzy.
Jerles jaýyngerdiń topyraǵy Altyndy aýylynda jer qoınaýyna tabystaldy. Rásimge osy tóńirektegi at tuıaǵy jetetin jerdiń bárinen kóp adam jınaldy. Quran baǵyshtalyp, as berildi.
Aqmola oblysy,
Bulandy aýdany
