Qos tarap Qazaqstan Respýblıkasynan Qyrǵyz Respýblıkasyna jóneltiletin ónimder men kórsetiletin qyzmetterdi eksporttaý aıasynda bank klıentterin saqtandyratyn bolady, sondaı-aq saýdalyq qarjylandyrý salasyndaǵy birlesken jobalardy iske asyrý týraly ortaq sheshimge keldi.
Kelisim strategııalyq áriptestikti damytýdy, birlesken baǵdarlamalar men jobalardan habar beretin semınarlardy, dóńgelek ústelderdi, tanystyrylymdardy uıymdastyrýdy kózdeıdi. Sonymen qatar syrtqy saýda qyzmetin júzege asyratyn kompanııalardy qarjylandyrý, saqtandyrý jáne ózge de qoldaý kórsetý máselesi qarastyrylǵan.
«Bul kelisim Qyrǵyzstandaǵy qazaqstandyq ónimdi satyp alýshylarǵa jeńildetilgen saýdalyq qarjylandyrýǵa ıe bolýǵa múmkindik beredi. Biz ekijaqty yntymaqtastyq aıasynda jıhaz jetkizý boıynsha alǵashqy jobany talqyǵa saldyq. Aldaǵy ýaqytta Qyrǵyzstannyń basqa bankteri de «KazakhExport» baǵdarlamasyna qyzyǵýshylyq tanytady dep úmittenemiz», dedi «KazakhExport» basqarmasy tóraǵasynyń orynbasary Qýanysh Muqajanov.
«RSK Bank» AAQ basqarma tóraǵasynyń birinshi orynbasary Aqylbek Turdalıev yntymaqtastyqtyń múmkindigi keń ekenin málim etti: «RSK Banki – «KazakhExport» kompanııasymen baılanys ornatqan Qyrǵyzstannyń alǵashqy banki. Bul yntymaqtastyq qazaqstandyq ónimdi Qyrǵyzstanǵa saýdalyq qarjylandyrý arqyly jetkizýdi josparlap otyrǵan kásipkerlerge, ıaǵnı eksporttaýshylar men ımporttaýshylarǵa tamasha múmkindik ekeni sózsiz».
«KazakhExport» ESK» AQ – «Báıterek» UBH» AQ enshiles kompanııasy. Kompanııanyń negizgi mindeti – túrli qarjy quraldary arqyly otandyq shıkizattyq emes eksporttaýshylarǵa qoldaý kórsetý. 2016 jyldan bastap «KazakhExport» 200-den asa eksporttaýshyǵa 870 mıllıard teńgeden asa somaǵa qoldaý kórsetti. Qoldaý kórsetiletin kásiporyndar ekonomıkanyń tamaq jáne hımııa ónerkásibi, mashına jasaý, agroónerkásiptik keshen, metallýrgııa jáne basqa da mańyzdy salalarynda jumys isteıdi. Eksporttyq baǵyttar tiziminde О́zbekstan, Reseı, Aýǵanstan, Qyrǵyzstan, Tájikstan, Qytaı, Túrikmenstan, Ázerbaıjan, Lıtva, Ýkraına, Belarýs, Italııa, Túrkııa jáne t.b. elder bar. Kompanııanyń «Eksporttyq saýdalyq qarjylandyrý» jáne «Akkredıtıvterdi saqtandyrý» qoldaý kórsetý quraldary sheteldik satyp alýshylar tarapynan qazaqstandyq ónimge suranysty arttyrý úshin engizilgen. Qarjylandyrý tólem sharttary boıynsha esep aıyrysýdyń akkredıtıvtik nysany qoldanyla otyryp, Qazaqstannyń ekinshi deńgeıdegi bankteri arqyly janama túrde usynylady.
Aıta ketken jón, «KazakhExport» kompanııasy 2019 jyly jeltoqsanda Bishkek qalasynda sheteldik ókildiń keńsesin ashqan bolatyn. О́kildik óz qyzmeti aıasynda kásipkerlerdiń tikeleı baılanystaryn jolǵa qoıýǵa, qazaqstandyq kásiporyndar men Qyrǵyz Respýblıkasyndaǵy áleýetti satyp alýshylar arasyndaǵy saýda qatynastaryn damytýǵa, sondaı-aq ekijaqty mámileler táýekelderin barynsha azaıtýǵa yqpal etedi.
