Palata spıkeri meımandarǵa iltıpat bildirip, Brazılııa elimizdiń Ońtústik Amerıkadaǵy negizgi seriktesteriniń biri ekenin atap ótti jáne eki memlekettiń kópjosparly yntymaqtastyǵynyń mańyzyna nazar aýdardy.
Sondaı-aq Senat tóraǵasy qos el arasyndaǵy ózara qarym-qatynastyń basym baǵyttarynyń biri parlamentaralyq baılanys ekenin aıtty. Búginde atalǵan baılanysty damytýǵa erekshe kóńil bólinip otyr.
«Qazaqstan Prezıdenti Qasym-Jomart Toqaev elderimiz arasyndaǵy dostyq pen ózara tıimdi qarym-qatynastardy odan ári nyǵaıtýǵa basa mán berip keledi. Keleshegi zor ekonomıkalyq baılanysymyz belsendi saıası yntymaqtastyqty nyǵaıta túsetini anyq. Qazaqstan Parlamentiniń eki palatasynda da Brazılııamen dostyq toby qurylǵan. Mundaı qadam bizdiń ekijaqty qarym-qatynasymyzǵa tyń serpin beretini sózsiz. Senat óz tarapynan elderimiz arasyndaǵy baılanysty ári qaraı nyǵaıtyp, damytýǵa belsendi yqpal etýge daıyn», dedi Máýlen Áshimbaev.
Kezdesý barysynda saýda-ekonomıkalyq jáne ınvestısııalyq yntymaqtastyqty keńeıtý máselelerin talqylady. Bul rette eki eldiń ınvestısııalyq ahýaly eskerile otyryp, birlesken jobalardy iske asyrýǵa arnalǵan usynystar aıtyldy.
Senat tóraǵasy Salyq kodeksine engizilgen ózgeristerdi, Memleket basshysynyń bastamasymen elimizde júrgizilip jatqan jáne Joldaýda baıandalǵan mańyzdy reformalardy atap ótti.
Sonymen qatar Máýlen Áshimbaev ornyqty damý máselelerine jáne Ornyqty damý maqsattarynyń iske asyrylýyn monıtorıngileý jónindegi parlamenttik komıssııanyń qyzmetine jeke toqtaldy.
О́z kezeginde Brazılııa Ulttyq kongresiniń depýtattary Andjelo Marıo Koronel de Azevedo Martıns pen Chıko Rodrıges kópjaqty qarym-qatynastardy damytýǵa múddeli ekenderin bildirip, Qazaqstanda júrgizilip jatqan saıası ózgeristerdiń tıimdiligine nazar aýdardy.
Aıta keteıik, elimizge sapar aıasynda Brazılııa depýtattary senatorlarmen dostyq tobynyń 2-otyrysyna qatysyp, «Qorǵas» shekara mańy yntymaqtastyǵy halyqaralyq ortalyǵynyń jáne Almaty oblysyndaǵy basqa da nysandardyń jumysymen tanysty.
