Jaı ǵana ańyz emes, ádemi ánmen ádiptelgen, ajarly ańyzben kómkerilgen, sulý yrǵaqty áýen bolyp tebirentip kórinbek. Balqadısha ániniń týý tarıhyn zertteýshilerdiń pikirine qaraǵanda, Jylandy taýynyń bókterindegi Musa Montaı aýylynda jaryq dúnıe esigin ashqan náresteniń shildehanasy ótkizilgeli jatyr eken. Alty Alashqa asqaq ánimen aty málim bolǵan Aqan seri de osy aýylǵa at basyn tirepti. Tabıǵaty tamyljyǵan ólkeni aralap, serilik quryp júrgen shaǵy. El shetine ilikken serilerdiń tobyn kórgen aýyldyń úlkenderi shylbyrlaryna jarmasyp, qoltyqtarynan demep, dastarqanǵa shaqyrady. Ataǵy jer jaryp turǵan Aqan seriniń janyna jastardyń eshqaısysy otyrýǵa batpapty. Bálkim, ónerin syılaǵandyqtan shyǵar. Aýylǵa Seriniń kelgeni týraly habar Qadıshanyń da qulaǵyna jetse kerek. Qyrmyzy qyzdarǵa ilesip ol da jetedi. «Aýylǵa áıgili Seri kelse, nege qosylyp án shyrqamasqa?», dep nazdana sóıleı keledi. Qyzdyń aǵalary bul jaıdy estip qalsa kerek. Boı jetip otyrǵan qyzdy Seriniń qasynan alyp ketken jón. Biraq qalaı? Amalyn tappaı áıelderin jumsaıdy. Áńgimeleri jarasyp qalǵan Seri Qadıshany jibergisi kelmeıdi. Amal joq, eki birdeı jeńgesi kelip otyr. Arttarynda qabaqtary túksıgen aǵalary tur. Endigisi ábestik. Sol sátte arýdyń tańnyń móldir shyǵyndaı jan dúnıesin, kórkem beınesin, jibekteı esilgen minezin beınelegen án Zerendiniń bıigine quldılaı kóterilip, Kóksheniń bar dalasyna tarap bara jatady. Búgingi kúni jalpaq jurtqa rýhanı azyq bolǵan áıgili án osylaı týsa kerek. Áýel basta toqsan shýmaq bolǵan desedi. Keıingige jetkeni jurnaǵy ǵana. 1988 jyly Qaırolla Júzbasov qurastyrǵan jınaqqa «Balqadısha» ániniń úsh nusqasy engen. Qazir úsheýi de aıtylyp júr. Úsheý bolǵanmen, taqyryp bir, mazmun ortaq.
