Sýretterdi túsirgen – Rýslan Kadyrov
Teatr ujymy gastroldik saparlarǵa paıdalaný úshin yńǵaıly avtobýsty kópten beri qajetsinip júrgen edi. Mine, endi istiń oraıy kelip, mereıtoı aıasynda 41 orynǵa arnalǵan «King long» markaly zamanaýı avtobýs satyp alýǵa oblystyq bıýdjetten 65 mln teńge bólindi. Teatrdyń gastroldik saparlarǵa jıi shyǵatynyn eskersek, jańa avtobýs ártisterdiń alys-jaqyn jol júrýleri úshin qolaıly bolsa, sol sııaqty kostıýmderin, rekvızıtterin, dekorasııalaryn tasymaldaýdy aıtarlyqtaı jeńildetedi.
Máselen, jaqyn arada teatr ujymy Qaraǵandyda ótken Qalıbek Qýanyshbaevtyń 130 jyldyǵyna arnalǵan «Syn shyn bolsyn» atty respýblıkalyq teatr festıvaline qatysyp, M.Sebastıannyń «Aty joq juldyz» lırıkalyq dramasyn usynyp, II orynǵa ıe boldy. Bul da oblys úshin úlken mártebe.
Shyǵarmashylyq ujym múshelerimen áńgimelesken óńir basshysy Beıbit Isabaev teatrdyń qoǵamnyń adamgershilik rýhyndaǵy tárbıesine jáne jalpy mádenı damýyndaǵy róline toqtalyp ótti.
«Adam teatrǵa kelgende, jany demalyp, rýhanı jańǵyryp qaıtady. Qazir kóp ýaqytyn áleýmettik jelilerde ótkizetin jas urpaq úshin teatrdaǵy sheksiz emosııa, saýatty sóıleý máneriniń tárbıesi asa mańyzdy. Teatr jáne kıno aktrısasy Bıken Rımovanyń 100 jyldyq mereıtoıy aıasynda ótetin «BIKEN» I Halyqaralyq teatr festıvalin sizdermen birge laıyqty deńgeıde ótkizemiz dep oılaımyn, bul is-shara ulttyq dástúrler men qundylyqtardy saqtaýǵa, qazaq teatry men ónerin damytýǵa mańyzdy úles qosady, eń bastysy, teatrǵa kórermen tartýǵa zor yqpal etedi», dedi ol.
Munan keıin is-shara Almaty qalasynan kelgen «Sazgen sazy» folklorlyq-etnografııalyq ansambliniń konsertimen jalǵasty. Kórkemdik jetekshisi – Qazaqstannyń eńbek sińirgen qaıratkeri, «Qurmet» ordeniniń ıegeri Baǵdat Tilegenov. Belgili mýzykalyq ujym Jetisý turǵyndaryna folklorlyq sazǵa toly «Ǵasyr sazy» dep atalatyn jandy konserttik baǵdarlama usyndy. Is-sharaǵa «Jetisý sazy» FEA da qatysty.
Jetisý oblysy
