Jańa kabınet túrkologııa men túrik tilin úırenýge qajetti materıaldyq-tehnıkalyq bazamen, elektrondy jáne baspa oqý quraldarymen, zamanaýı elektrondy mýltımedııalyq taqtamen jabdyqtalǵan.
«Túrik tili men mádenıeti» aýdıtorııasynyń ashylýyna L.N.Gýmılev atyndaǵy EUÝ rektory Erlan Sydyqov, Túrkııanyń Qazaqstandaǵy Tótenshe jáne ókiletti elshisi Mustafa Kapýdjý, Túrik yntymaqtastyq jáne úılestirý agenttiginiń prezıdenti Hıkmet Ýzdenoǵly, ýnıversıtettiń halyqaralyq qatynastar fakýlteti túrkologııa kafedrasy oqytýshylary men stýdentteri qatysty. Kezdesý barysynda E.Sydyqov EUÝ Túrkııanyń 35-ten asa jetekshi ýnıversıtetimen belsendi yntymaqtastyq ornatqanyn, ondaǵan stýdent EUÝ-da bilim alyp jatqanyn atap ótti. Elimizdiń jastary akademııalyq utqyrlyq baǵdarlamalary aıasynda Túrkııa ýnıversıtetterinde bilimderin keńeıtýge múmkindik aldy.
«Yntymaqtastyq mamandardy birlesip daıarlaý sheńberinde ǵana emes, sonymen qatar elderimizdiń stýdentteri men oqytýshylary úshin akademııalyq utqyrlyq jáne taǵylymdama baǵdarlamalary aıasynda da damyp otyr. Bul kabınet Túrkııa men Qazaqstandy biriktiretin taǵy bir altyn kópir bolmaq. Osy aýdıtorııa negizinde túrkitaný salasyndaǵy mamandardy daıarlaý kúsheıtiledi. Bul kabınet eki eldiń mádenıeti men dástúrlerin biriktirý ortalyǵy bolatynyna senimdimin. Ýnıversıtet ujymy Túrkııa elshiligine jáne Túrik yntymaqtastyq jáne úılestirý agenttigine kabınetti jabdyqtaǵany úshin alǵys bildiredi», dedi E.Sydyqov.
Jańa oqý kabıneti EUÝ-dyń túrkitaný kafedrasyna qaraıdy. Bul kafedra 2010 jyldan beri bakalavrıat, magıstratýra jáne doktorantýra deńgeıinde 400-ge jýyq maman daıarlady. Qazirgi tańda 3 bilim berý baǵdarlamasy boıynsha 100-den asa stýdent oqyp jatyr.
Stýdentterge arnalǵan jańa kabınet Túrkııanyń Qazaqstandaǵy elshiligi men Túrik yntymaqtastyq jáne úılestirý agenttiginiń (TIKA) qoldaýymen ashyldy.
«Biz bul kabınetti túrik halqy, túrik jastary men qazaq baýyrlarymyzdyń qarym-qatynasyn odan ári jaqsartatyn joba retinde qarastyramyz. Bul aýdıtorııa únemi stýdentterge toly bolady jáne stýdentter túrik tilin óte jaqsy meńgeredi dep oılaımyn. Olarǵa jańa múmkindikter ashylady. Ártúrli túrik fırmasynda jumys istep, Túrkııada magıstratýrada oqýǵa múmkindik týady. Eń bastysy, jastar elderimizdi biriktirip, Qazaqstan men Túrkııa arasyndaǵy qarym-qatynastyń damýyna mańyzdy úles qosady», dedi Túrkııa elshisi M.Kapýdjý.
Túrik yntymaqtastyq jáne úılestirý agenttiginiń prezıdenti Hıkmet Ýzdenoǵly til adamdar arasyndaǵy qarym-qatynasty qalyptastyratyn kópir ekenin atap ótti. Onyń aıtýynsha, aýdıtorııanyń ashylýy yntymaqtastyq kókjıegin keńeıtýge múmkindik beredi.
