Osy tusta taǵy da «Ekibastuzdaǵy jarylys sabaq bolmady ma?» degen saýal týady. Jospar boıynsha senbi kúni jylý berile bastaýy kerek-tin. О́kinishke qaraı, JEO-daǵy apat qala turǵyndaryn alańdatyp qoıdy. Al kásiporyn basshylyǵy bolsa, «apat sebebin anyqtaımyz, saldarymen kúresip jatyrmyz» degen jaýappen shekteldi.
Memleket basshysy bıylǵy Joldaýynda energetıkalyq qaýipsizdik máselesine aıryqsha toqtalǵany belgili. Bul másele Úkimette de apta saıyn talqylanady. Osy oraıda dál jylý maýsymy bastalar tusta Qaraǵandyda oqys jaǵdaıdyń oryn alǵany, árıne, olqylyq boldy.
Apat saldarynan qaraǵandylyqtar jaryqsyz, sýsyz qaldy. Baǵdarshamdar óship, keptelis kóbeıdi. Osy tusta qalanyń jol qozǵalysyn retteýge jol-patrýldik polısııa qyzmetkerleriniń jetispegenin de aıta ketkenimiz jón.
«Qazirgi sátte Topar GRES-2 júktemeni kóterip jatyr jáne meniń tapsyrmammen birinshi orynbasarym Vadım Basın bolǵan jaǵdaıdy anyqtaý úshin stansaǵa attanyp ketti. Júktemeni kóterý jáne óńir tutynýshylaryna elektr jaryǵyn qysqamerzimde berý úshin «KEGOC» jáne barlyq stansalar shuǵyl sharalardy qolǵa alyp jatyr», dep beıneúndeý joldaǵan oblys ákimi Ermaǵanbet Bólekbaev turǵyndardan túsinistik tanytýdy surady.
Alaıda turǵyndar áleýmettik jelide jeldeı esken túrli aqparatty oqyp dúrligýmen boldy. WhatsApp áleýmettik jelisindegi chattarda jaryqtyń keshke deıin, tipti kelesi kúni de jóndi berilmeıtini jóninde hattar tarady.
– Resmı aqparatqa seneıik desek, jalpylama jaýap bere salady. Osy senbi kúni jylý beriledi dep otyrǵanda, apat bolǵany shynymen alańdatyp qoıdy. Qazir kúzgi sýyq qoı. El tońa bastady. Endi apat sebebin anyqtap, ony qalpyna keltirgenshe de kóp ýaqyt ketpeı me degen ýaıym bar. Aldyńgúni qala ishin sý basty, endi, mine, jaryqsyz qaldyq. Búgin mundaı keleńsizdik týyndasa, qys ishinde ne kútip tur degen oı da bar, – deıdi qala turǵyny Eldos Bolatuly.
Endi Energetıka mınıstrliginiń atomdyq jáne energetıkalyq qadaǵalaý men baqylaý komıteti apattyń sebebin anyqtaý isimen aınalysady.
«Qaraǵandy-energosentr» JShS 220 kV JEO-3 ashyq taratý qurylǵysynda qysqa tuıyqtalý jáne Qaraǵandy JEO-3 jáne Topar GRES-in baılanystyratyn 110 kV elektr berý jelileriniń odan ári shamadan tys júktelýi saldarynan atalǵan elektr stansalarynda generasııanyń tolyq tómendeýi oryn aldy. О́ndiristiń tómendeýine baılanysty Qaraǵandy qalasy men Qaraǵandy oblysynyń ónerkásiptik tutynýshylary boıynsha shamamen 350 MVt shekteýler engizildi», dep resmı aqparat taratty Energetıka mınıstrligi.
Degenmen keshkilik qalanyń birneshe aýdanyna jaryq berile bastady. «Qaraǵandy Jaryq» JShS qyzmetkerleri qyzý kirisip, jaryq qosylmaǵan basqa da kóshelerdi elektr qýatymen qamtamasyz etýdi jalǵastyrýǵa kiristi.
Joǵaryda atap ótkendeı, aldyńgúni Qaraǵandy kósheleri kólge aınaldy. Tolassyz jaýǵan jaýyn keshkilik el-jurtty ábden ábigerge saldy. Qalanyń sýaǵarlary bitelip qalǵandyqtan, jaıaý júrginshiler tolarsaqtan sý keshýge májbúr boldy.
Tipti keıbir mekemelerdi de sý basty. Avtobýstarǵa da sý kirgen. Kólikter sýǵa belsheden batty. Keıbir júrgizýshilerdiń kóligi júre almaı, sý ortasynda qaldy. Ishin sý alyp ketkendikten, kóliktiń ústine shyǵyp alǵan jolaýshylardy da kórdik. Qaraǵandy tehnıkalyq ýnıversıtetine de sý kirip, stýdentter jalańaıaq syrtqa qashyp shyǵypty.
Ákimdik jaýynnyń mólsheri kóptigin jaýap etedi. Al jurtshylyq sýaǵarlardyń joqtyǵyn, barlary bolsa bitelip qalǵanyn aıtyp narazy.
– Qaraǵandyǵa jańbyr jaýsa boldy, kólge aınalady. Aıaq alyp júretin jer joq. Jańbyrdyń sýy sýyq qoı. Aýa raıy da salqyn. Qanshama adam sý keshti keshe. Únemi sý basady da jatady. Kóligi joq jurtqa qıyn. Qanshama kólik sý astynda qalyp, buzyldy. Bir-aq saǵat quıǵan shyǵar toqtamaı. Buryndary da jańbyr budan qatty jaýatyn. Biraq mundaı bolmaıtyn, – deıdi qala turǵyny Ashat Nıhanbaıuly.
Budan bólek, áleýmettik jelide kólge aınalǵan kóshelerdiń túrli vıdeolary taraýda. Ondaǵy onlaın eldiń de pikiri joǵarydaǵy áńgimege saıady.
Qaraǵandydaǵy ekikúndik qarbalas osy. Ábden ábigerge túsken Qaraǵandy jurty ár isten qaıyr kútedi.
Qaraǵandy oblysy
