Eki kúnge jalǵasqan is-sharada otandyq jáne sheteldik anımasııa salasynyń úzdik mamandary sheberlik sabaǵyn ótkizdi. Atap aıtqanda, otandyq ARA stýdııasynyń negizin qalaýshylar, Shyraq anımasııa mýltfılminiń avtorlary Meıirjan Sandybaı men Baqytjan Shabdýkarımov, «Úsh mysyq» anımasııa hıkaıasymen tanymal Metra Films kompanııasynyń óndirisine jaýapty Alekseı Grıshın, «Sóıleıtin Tom», «Asterıks pen Obelıks» jobalarynyń kórkemdik jetekshisi Krıs Palamara, Nickelodeon, Cartoon Network, Disney sekildi iri anımasııa kompanııalarynyń storyboard-sýretshisi Shont Nıgogosıan jáne Lumiries Group kompanııasynyń negizin qalaýshylardyń biri Marııa Kosareva tájirıbelerin tanystyrdy.
Alekseı Grıshın «Anımasııa jasaý úderisi: kezeńderi, tehnologııasy jáne kásibi» taqyrybynda ýorkshop ótkizip, prodıýserler meńgerý kerek mashyqtarǵa toqtaldy. Onyń aıtýynsha, jasandy ıntellekti anımasııa mamandarynyń jumysyn jeńildetkenimen, olardyń ornyn basa almaıdy. О́ıtkeni báribir JI kómegimen jasalǵan jumystar odan ári jetildirýdi qajet etedi.
Al Krıs Palamara anımasııa jasaýdyń alǵashqy qadamdary men keıipkerlerdiń dızaıny týraly áńgimeledi. Onyń aıtýynsha, anımasııa kontentin jasaý úderisi osy salaǵa tán zańdylyqtardy eskerý, sıýjet qurý, artbord jasaý jáne keıipkerlermen jumys degen negizgi kezeńderden turady. Ýorkshop barysynda sheteldik sarapshy qatysýshylarmen birge anımasııa keıipkerlerin beınelep, jas mamandardyń jumystaryna taldaý jasady.
Aıta keteıik, ýorkshop taqyryptary mýltıplıkasııa jasaý kezinde zamanaýı tásilder men tehnologııalardy qoldaný, aýdıtorııanyń suranysyna saı jobanyń qundylyǵyn arttyrý, ındýstrııa salasyna sheteldik sarapshylardy tartý, belgili anımasııa stýdııalarymen baılanys ornatyp, seriktestik qurý syndy mańyzdy taqyryptardy qamtydy.
Is-sharanyń ekinshi kúni Shont Nıgogosıannyń sheberlik sabaǵymen jalǵasty.
«Eger storyboard-sýretshi kórinisti qalaı sýretteý kerek ekenin bilmese, demek ol sıýjettegi bir tusty nazarynan tys qaldyrǵan. О́ıtkeni kórermenniń jasyna baılanysty sıýjet pen kórinis árqıly beınelenedi. Keıipkerlerdiń túsin, pishinin ózgertip, kóńil kúıin kórsetetin bólshekterdi túrlishe qubyltýǵa bolady», deıdi sarapshy.
Anımasııa jasaý úderisinde kórinistiń tartymdy, mazmunnyń kreatıvti bolýynan da basqa mańyzdy qadam bar, ol – pitching, ıaǵnı daıyn ónimdi demeýshilerge nemese seriktesterge usyný. Bul máselege jıyn barysynda Marııa Kosareva toqtaldy. Sondaı-aq qonaqtar men qatysýshylar Pizza Pitch arnaıy sessııasyna qatysyp, suraq-jaýap formatynda pikir almasty. Jıyn sońynda olarǵa arnaıy sertıfıkat tabystaldy. Eske salaıyq, is-sharany ótkizýdegi maqsaty – anımasııa ındýstrııasy salasynda jumys isteıtin otandyq mamandar men stýdentterdiń kásibı biligin arttyryp, sheteldik mamandarmen tájirıbe almasýyna jaǵdaı jasaý. Ýorkshop Mádenıet jáne aqparat mınıstrliginiń otandyq kreatıv ındýstrııany damytý baǵytyndaǵy jumystary aıasynda ótti.
