Qurmetti qonaqtardy bıyl ashylǵanyna 120 jyl tolatyn M. Áýezov atyndaǵy Semeı pedagogıkalyq kolledjiniń basshysy Shaǵangúl Janaeva qarsy alyp, Alashtyń oqý ordasynyń ashylý tarıhy men qazirgi kezeńdegi baǵyndyrǵan belesteri, qandaı tarıhı tulǵalardyń shyńdalý mektebi bolǵanyn áńgimelep berdi.
– Bul – táýelsiz elimiz úshin ulttyq sananyń qalyptasýyna yqpal etken tuńǵysh oqý orny. Shákirtterimizge kúlli Alash qaıratkerleri, atap aıtqanda, Júsipbek Aımaýytuly, Qanysh Sátbaev, Muhtar Áýezov, Álkeı Marǵulan bastaǵan ult zııalylarynyń bitim-bolmysy, ult bolashaǵy jolynda atqarǵan isteri jaıynda keńinen nasıhattalady. Murat Muhtaruly osydan bes jyl buryn kelip, kolledjimizdiń tórinde bolǵan. Kolledjdiń tarıhı mańyzyn óte tereń túsinedi, – deıdi M. Áýezov atyndaǵy Semeı pedagogıkalyq kolledjiniń dırektory Sh.Aldamjarqyzy.
Ǵasyrdan asa tarıhy bar oqý ornynyń taǵy bir ereksheligi – ǵımaratynyń baspaldaqtary o bastan salynǵan qalpy, búgingi kúnge deıin búlinbeı saqtalyp keledi. Osy tusta taǵy bir aıta ketetin derek, pedagogıkalyq kolledj 1967 jyldan bastap, M.Áýezovtiń esimimen atalady. Jazýshy esiminiń berilýine sol kezdegi oqý ornynyń basshysy Asylhan Bekbaevtyń sińirgen eńbegi zor.
Taǵylymdy kezdesýde Murat Muhtarulynyń «Qazaq rýhy», anasy Fatıma Ǵabıtovanyń «О́rteńde óngen gúl» kitaptarynyń tusaýkeseri de erekshe saltanatpen ótip, tamashalaǵan jurtshylyqty tánti etti. Sondaı-aq «Muhtar Áýezov ómiriniń Semeı kezeńi» atty taqyrypta kandıdattyq dıssertasııa qorǵaǵan belgili ǵalym, ulaǵatty ustaz Raýshan Muqajanova da zertteýi týraly oıymen bólisti.
– Qazaqtyń birtýar tulǵasy M.Áýezovtiń ómiri men shyǵarmashylyq joly, izdenisteri jóninde keńestik kezeńde kólemdi zertteýler júrgizilgenimen, onyń keı týyndylary saıası synǵa tótep bere almaı, tasada qalyp kelgeni shyndyq. Búginde osy olqylyqtyń ornyn toltyryp, kópshilik nazarynan tys qalyp kelgen shyǵarmalaryn qaıta jańǵyrtatyn ýaqyt jetti. Sol turǵyda jazýshynyń ómiri men shyǵarmashylyǵynda Semeı jeriniń mańyzy erekshe, – deıdi fılologııa ǵylymdarynyń kandıdaty, dosent R.Muqajanova.
M.Áýezovtiń týǵan kúni qarsańynda uly jazýshynyń týyp-ósken jerine kelýdi murat etken mártebeli qonaqtar budan keıin Abaı aýdanyna saparlap, Jıdebaıdaǵy Abaı, Shákárim kesenesine baryp, Aqshoqyǵa aıaldap, Qunanbaı О́skenbaıuly men Áýez babalarynyń rýhyna taǵzym etti. Jazýshynyń kindik qany tamǵan jeri – Bórilige kelip, ákesi Omarhan men anasy Nurjamaldyń kesenesinde bolyp, M.Áýezovtiń mýzeı-úıin de tamashalady.
El ishinde erteden sanaǵa sińgen «Abaı dese, Muhtar Áýezov, Muhań dese, Abaı eske túsedi», degen sóz bar. Al osynaý data – Áýez áýleti úshin ǵana emes, kúlli Semeı jurtynyń jylda asyǵa kútetin mezeti. Ony bylaı qoıǵanda, «El áńgimeshi, el áńgimeshi bolǵan soń, jer áńgimeshi» degen uly jazýshydan qalǵan sózdiń qudireti de tartyp turatyny shyndyq.
