О́nimdilikti arttyrý maqsatynda mıneraldy tyńaıtqyshtardyń qunyn sýbsıdııalaý baǵdarlamasyna sáıkes – 122 mln teńge, tuqym sharýashylyǵyn damytýdy sýbsıdııalaýǵa 20 mln teńge, pestısıdterdiń, bıoagentterdiń (entomofagtardyń) qunyn sýbsıdııalaýǵa 600 myń teńge bólindi.
Sonymen qatar kúzgi jıyn-terim jumystaryn júrgizýge 44,3 tonna jeńildetilgen baǵamen berilgen janar-jaǵarmaı aýyl sharýashylyǵy taýaryn óndirýshilerge 245 teńgeden bosatylyp jatyr. Sonymen birge megapolıste aýyl sharýashylyǵy tehnıkalarynyń daıyndyǵy 93 paıyzdy qurap, kúzgi jıyn-terim naýqanyna tolyǵymen jumyldyryldy.
Resmı málimet boıynsha apta basynda áleýmettik mańyzy bar azyq-túlik taýarlarynyń baǵa ındeksi 0,1 paıyzǵa tómendegen. Al jyl basynan beri baǵa ósimi 103,4 paıyzǵa jetip otyr. Azyq-túliktiń qymbattyǵy jóninen Shymkent óńirler arasynda 11-orynda tur.
«Áleýmettik mańyzy bar azyq-túlik taýarlarynyń baǵasyn turaqtandyrý maqsatynda, bıýdjetten 8,7 mlrd teńge bólindi. Qomaqty qarajat esebinen 200-ge jýyq saýda oryndarynda birinshi qajettilikke kiretin azyq-túlik taýarlary naryqtaǵydan tómen baǵada satylyp jatyr. Sonymen qatar un, jumyrtqa, nan, kúnbaǵys maıy, sıyr, taýyq etterin óndirýshi kásiporyndarmen kelisimsharttar túzilip, bekitilgen saýda oryndarynda taýarlar óndirýshi baǵasymen satylady. 2023-2024 jyldardaǵy maýsymaralyq kezeńde kókónis ónimderiniń baǵa dınamıkasyn turaqty ustap turý úshin sharýa qojalyqtarymen forvardtyq kelisimsharttar túzilip, maýsymdyq kezeńde kókónister naryqqa shyǵarylatyn bolady. Apta saıyn qalanyń 8 jerinde azyq-túlik jármeńkeleri uıymdastyrylyp, kúndelikti tutynatyn taýarlar naryqtan 10-15% tómen baǵada saýdalanady. Jyl basynan beri osyndaı 320 jármeńke ótkizildi», dedi aýyl sharýashylyǵy basqarmasynyń basshysy Ábýnasyr Janbatyrov.
Sala basshysynyń aıtýynsha, baǵany qadaǵalaý jáne deldaldyq qyzmetti shekteý baǵytynda quzyrly mekemelermen arnaıy komıssııa qurylǵan. Qańtardan búginge deıin komıssııa 77 otyrys ótkizgen. Taldaý jumystarynyń nátıjesinde komıssııa 90-ǵa jýyq zańbuzýshylyq derekterin anyqtaǵan. Búgingi tańda, kemshilikterdiń tolyǵymen joıylǵanyn baıandady basqarma basshysy. Sondaı-aq kásipkerlik sýbektilerge elektrondyq shot-faktýralar arqyly hronometrajdyq zertteý júrgizilip, 54 jeke kásipker ákimshilik jaýapkershilikke tartyldy. Baǵany negizsiz ósýine jol bermeý maqsatynda saýda jelileri, bazarlar men taýar óndirýshilermen ózara yntymaqtastyq týraly memorandým túzilgen.
«Jalpy qala aýmaǵynda azyq-túlik taýarlarynyń tapshylyǵy joq, baǵa turaqty baqylaýda ustap otyrmyz», dedi sala ókili.
ShYMKENT
