Joǵaryda atalǵan mýzeı dırektorynyń orynbasary Elmıra Alshymova bul jádigerdiń Amangeldi Imanovqa tıesili ekenin murajaıdyń túsim kitabyndaǵy 1964 jyly 21 tamyzdaǵy jazba rastaıtynyn jetkizdi.
Batyr dombyrasy – naǵyz sheberdiń qolynan shyqqan minsiz dúnıe deýge bolady. Ony elimizdiń batys aımaǵynda qoldanylatyn úlgide jasaǵan. 14 perneli, shanaǵynyń kólemi sopaqsha. Aspaptyń qaptaly, beti, syrtqy saýyr dúmi jeke-jeke shabylyp, sheberlikpen jymdastyra qurastyrylǵan. Dombyranyń syrty súıekpen kómkerilgen. Jasalǵan ýaqyty: HIH ǵasyrdyń sońy men HH ǵasyrdyń basyna sáıkesedi.
Jýrnalıst Tolqyn Sultanqyzy batyr atasynyń ónerden qarajaıaý bolmaǵanyn aıtady. Bas sardardyń týǵan baýyry Esentaı syrnaıdy keremet tartqan. «Bala kúnimde Aqsary ájem Esentaı atamdy batyr qaınaǵama tartqan ónerli dep otyratynyn estip edim», dedi ol.
