Foto: parlam.kz
«Úkimet saǵatynda» depýtat elimizdegi aýrýhanalar aı saıyn kvota arqyly qarajat alatynyn aıtty.
«Bir aıǵa KT, MRT jasaýǵa belgili bir kvota beriledi. Al eger naýqastar sany budan kóp bolsa, onda dáriger naýqasty kelesi aıǵa jazýǵa májbúr. Osyny eskersek, aı saıynǵy qarjylandyrýdy ár emhana ózderi sheshý kerek. Medısınalyq aqparattyq júıeler (KMIS, Damýmed, RBıJFV, HPN-portal, gepatıt-portal, NRBT, NRBSD) arasynda baılanys joq. Dárigerler naýqastardyń derekterin túrli medısınalyq aqparattyq júıege engizýge májbúr bolǵandyqtan, naýqastardy qaraýǵa ýaqyttary da joq. Bir naýqasty tekserýge beriletin standartty ýaqyt kompıýter toltyrýǵa ketip otyr. Sondyqtan, dárigerlerdiń júktemesin azaıtý maqsatynda biryńǵaı aqparattyq júıeni iske qosý kerek nemese joǵaryda atalǵan medısınalyq aqparattyq júıeler arasynda baılanys ornatý kerek. Jyldyń basynda tarıf belgisiz bolady, aýrýhanalar, emhanalar aı saıyn naýqastarǵa boljaldy shamamen emdeý sharalaryn júrgizedi. Biraq jyl basynda belgilengen tarıf naryqtaǵy baǵamen sáıkes kelmeıdi. Al medısınalyq uıymdardyń qyzmet kórsetýi ár aıǵa belgilengen mólsherden asyp ketse, qosymsha qarjylandyrylmaıdy. Al jetpeı qalsa, artylǵan qarjyny qaıtaryp alady. Bul medısınalyq mekemege úlken zııan ákeledi. Sondyqtan medısınalyq uıymdarǵa jalpy jasalǵan qyzmetine qaraı tólený kerek. Emhanalardy qarjylandyrý júıesi tirkelgen azamattar sanyna baılanysty bolý kerek. Eger azamat bir emhanadan basqa emhanaǵa aýysqan jaǵdaıda sol azamatqa bólinetin aqshasy aýysqan emhanasyna aýdarylýy tıis. Azamattarda «saqtandyrylǵan» mártebesi bolmaǵan jaǵdaıda onymen medısınalyq qyzmetkerleri emes, azamattardy qoldaý ortalyǵy nemese áleýmettik qyzmetkerler aınalysý kerek», dedi J.Áshimjan.
Depýtat medısınadaǵy túıtkildi máseleniń biri - syzyqtyq shkalanyń qoldanýdaǵy keleńsizdikti de atap ótti. J.Áshimjan syzyqtyq shkala ár emhana men aýrýhananyń emdeıtin syrqattarynyń sanyn kvotalap, shekteıtinin aıtty. Osynyń saldarynan medısınalyq uıymdar naýqas qansha jerden medısınalyq saqtandyrylǵan bolsa da betin qaıtarýǵa májbúr bolatynyn jetkizdi. Bundaı máselede MÁMS aqsha tólemeıtindikten, syzyqtyq shkalany alyp tastaýdy usyndy.
