Bıyl «Táýelsizdik urpaqtary» granty boıynsha 3 mln teńgeden 30 joba qarjylandyrylady. Maqsat – belsendi shyǵarmashyl jastar qaýymdastyǵyn qalyptastyrýǵa baǵyttalǵan jastardyń jańa jáne qoldanystaǵy bastamalaryn memleket tarapynan qoldaý.
– Granttar 5 baǵyt boıynsha úlestiriledi. Ashyp aıtsaq, ǵylymı jobalar men zertteýlerdi iske asyrý úshin «Ǵylym» salasyna, elimizdiń mádenı murasyn, dástúr men ónerdi ilgeriletý maqsatyndaǵy jobalar úshin «Mádenıet» salasyna, jańa IT sheshimder men jobalardy, onyń ishinde jańadan bastalǵan startap bastamalardy iske asyrýǵa «Aqparattyq tehnologııalar» baǵytyna, ekonomıkanyń basym sektorlarynda jańa bıznes-ıdeıalardy iske asyrýda «Bıznes», jastar úshin tanymdyq, paıdaly, qyzyqty kontent qurý jónindegi jobalarǵa arnalǵan «Medıa» salasyndaǵy úzdik jobalarǵa beriledi. Úmitkerlerdiń konkýrstyq ótinimderi 26 qarashaǵa deıin elektrondyq nusqada t.urpaktary2023@gmail.com poshtasy arqyly qabyldanady, – dedi Mádenıet jáne aqparat mınıstrligi Jastar jáne otbasy isteri komıteti tóraǵasynyń orynbasary Rollan Quspan.
Baıqaý eki kezeńnen turady. Bastapqyda ýákiletti organ konkýrstyq ótinimderdi qabyldasa, keıin ótinimder baǵalanyp, kil myqtylar anyqtalady. Qazylar alqasy quramynda ortalyq atqarýshy organdar, azamattyq qoǵamnyń ókilderi, ǵalymdar jáne grant baǵyttary boıynsha mamandar men sarapshylar bolady. Konkýrstyq komıssııa músheleriniń sany 5 adamnan kem bolmaıdy.
«Konkýrs jeńimpazy mindetti túrde arnaıy grantty aýdarý úshin ekinshi deńgeıdegi bankterde jeke shot ashady jáne ýákiletti organ konkýrs qorytyndylary týraly hattama negizinde bank shotynyń nómirin usynǵannan keıin grant alýshymen shart jasasady. Grant jeńip alǵan adam úsh aıda bir ret jobanyń iske asyrylý barysy týraly ýákiletti organǵa esep usynady. Ýákiletti organ kúntizbelik bir jyl ishinde grant qarjysynyń maqsatty paıdalanylýyn qadaǵalaıdy. Eger jeńimpaz grantty maqsatty túrde paıdalanbasa, ýákiletti organ odan grant aqshasyn qaıtarýdy talap etýge quqyly. Grant alýshy qarajatty ýákiletti organnan habarlama alǵan kúnnen bastap kúntizbelik 30 kún ishinde qaıtarýǵa tıis. Belgilengen merzimde qaıtarmaǵan jaǵdaıda, olar zańnamaǵa sáıkes óndirip alynady» delingen «Táýelsizdik urpaqtary» grantyn berý qaǵıdalaryn bekitý týraly qujatta.
Budan bólek, jergilikti atqarýshy organdary da «Táýelsizdik urpaqtary» grantyn taǵaıyndaıdy. Ákimdikterdiń aqparatyna sáıkes, búginde aımaqtarda 226 grant berý kózdelgen. Ázirge 70-i ǵana berilgen.
– Atap aıtqanda, Jetisý oblysynda Halyqaralyq jastar kúnine oraı 10 joba úzdik atanyp, árbir jobaǵa 3 mln teńge mólsherinde grant berildi. Ulytaý oblysynda ǵylym, mádenıet, aqparattyq tehnologııalar, bıznes, medıa baǵyttary boıynsha 43 jas adamǵa 1 mln teńge mólsherinde grant tabystaldy. Sondaı-aq Qostanaı oblysynyń jastaryna 12 grant: 7 grant – 700 myń teńge, 4 grant – 500 myń teńge, 1 grant 200 myń teńge mólsherinde berilse, Qyzylorda oblysynyń 5 jas óz jobalaryn iske asyrý úshin 300 myń teńge mólsherinde grant jeńimpazy atandy. Jyl aıaǵyna deıin jastarǵa 156 grant berý josparlanyp otyr. Onyń ishinde Aqtóbe oblysyna – 30, Mańǵystaý oblysyna – 25, Pavlodar oblysyna – 20, Jambyl oblysyna – 15, Almaty qalasyna – 13, Aqmola – 11, Almaty, Atyraý jáne Batys Qazaqstan oblystary – 10 granttan, Shyǵys Qazaqstan oblysyna – 7, Shymkent qalasyna 5 grant bólinedi, – dedi Rollan Quspan.
Byltyr memleket usynǵan múmkindikti qalt jibermeı, ótinishterin joldaǵandar arasynan 33 azamat jeńimpaz atandy. Osylaısha, «Ǵylym», «Mádenıet», «Aqparattyq tehnologııalar», «Medıa» baǵyty boıynsha 6 jobadan, al «Bıznes» salasynda 9 úzdik joba qarjylandyrylǵan.
Darıǵa QURMANALY,
L.N.Gýmılev atyndaǵy Eýrazııa ulttyq ýnıversıtetiniń stýdenti
