El teatrlarynyń erekshe toıy

Onyń ashylý saltanatynda oblys ákimi Ǵaýez Nurmuhambetov qut­tyq­taý sóz sóılep, óner ordalary­nyń Qyzyl­jar topyraǵyna qadam bas­qandary­na rızashylyǵyn bil­dirip, festıval­de ónerdiń naǵyz maıtalmandarynyń jeńiske qol jet­kizýine tilektestik bil­dirdi. Sonymen qatar ol ózderiniń úsh teatrynyń halyqaralyq sahnalarda­ǵy je­ńisterin elge tanystyryp ótti. Ara­larynan Samal Eslámova sııaqty Kann festı­valiniń jeńimpazy shyqqanyn da ákim aýyz toltyryp aıtty. Sosyn qazylar alqasynyń tóraǵasy, qazaq kıno jáne teatr óneriniń metri, KSRO men Qazaqstan Memlekettik syı­lyq­tarynyń laýreaty, Eńbek Eri Asanáli Áshimovti sahna tórine shaqyrdy.

Jańadan salynǵan qazaq teatry­nyń ǵımaratynda ıne shanshar oryn bolmady. Has ónerge shólirkegen sol­tústikqazaqstandyqtar búgingi kesh­ke taıly-taıaǵymen tegis kelgen­deı. Jınalǵan halyq sah­naǵa kóterilgen áıgili ártisti túre­gelip, qol soǵyp qarsy aldy. Ákim óner dúldúliniń arqasyna Qyzyljar hal­qynyń atynan shapan japty. «Fes­tıval – óner súıer qaýymǵa jasalyp otyrǵan syılyq. Osyndaı fes­tıvalderde ónerpazdar da ózin ózgemen salystyryp, jaqsysyn boıyna sińirip, ónerlerin ushtaı túsedi. Men soltústikqazaqstandyqtardyń ys­­­tyq yqylasyna rıza bolyp turmyn. Bul óńirden ádebıet pen ónerdiń talaı maıtalmandary shyqqan. Halyq áli de ónerge qushtar ekeni kórinip tur», dedi Asekeń.

Qazannyń 9-y men 15-si aralyǵynda óte­tin festıvalde elimizdiń teatr­la­ry­­nyń 10 spektakli kórsetiletin bo­la­dy. Olar S.Muqanov atyndaǵy qa­zaq-saz­dy drama teatrynda jáne N.Po­godın atyn­daǵy orys drama teatry­nyń sahnalaryn­da qoıylady. Olar­dyń ara­synda M.Áýezovtiń «Qorǵan­syzdyń kúni» áńgimesi­niń jelisin­de G.Mır­ǵalıeva qoıǵan osy attas spektakl, E.Hemen­­gýeıdiń D.Jumabaı sah­nalaǵan «Shal men teńiz» spektakli bar.

Alǵashqy kúni A.Núsiptiń «Maǵ­jan» atty dramasy qoıyldy. Bul spektakldi sahnalaýǵa Italııa óner­­pazdary da qa­tysqan. Ol qazaq dala­syndaǵy ashtyq jyldarynyń zul­matyn kórsetken.

Qyzyljar sahnasynda qoıyla­tyn spektaklderdi Almaty, Astana, Túrkis­tan, Aqtaý, Taldyqorǵan, Jez­qazǵan, Qaraǵandy, Pavlodar teatr­lary ázirlegen. Sońǵy festıval Pet­ro­pavlda 21 jyl buryn bolǵan edi. Byl­tyr ol Astana qalasynda bolyp, oǵan 21 óner ujymy qatysty. Jalpy, Qazaqstan teatrlarynyń festıvalderi 1992 jyldan beri ótkizilip keledi.