1963 jyldan beri úzdiksiz ótkizilip kele jatqan velosporttan «Túrkııa Prezıdenti týryna» qatysyp jatqan otandasymyz jarystyń úshinshi kúnine josparlanǵan taýly kezeńinde jeńis tuǵyryna kóterildi. Bıiktigi 18,4 shaqyrymdy (kezeńniń jalpy uzaqtyǵy 104,1 shaqyrym) quraıtyn Babadag taýyn birinshi bolyp eńserip, márege alǵashqylardyń biri bolyp jetti. Alekseı Lýsenkonyń sońyna ilesken «Bora–Hansgrohe» komandasynyń germanııalyq veloshabandozy Ben Zvıhoff pen «Astananyń» kolýmbııalyq sportshysy Harold Tehada ekinshi jáne úshinshi oryndardy ózara bólisti.
Jalpy, «Túrkııa Prezıdenti týry» Qazaqstan sportshylary úshin sátti týrnır sanalady. 1995 jyldan bergi jarystarda otandastarymyz aldyna jan salmaı júr. Aıtalyq, 1995 jylǵy jarystyń alǵashqy úsh orny otandastarymyzǵa buıyrǵan. Andreı Kıvılev bas júldeni jeńip alsa, Vadım Kravchenko – kúmis, Sergeı Lavrınenko qola júldeger atanǵan-dy. Arada bes jyl ótkende Lavrınenko top jarsa, Kravchenko ekinshi orynnan kórindi. 2001 jyly Lavrınenko ekinshi ret úshinshi orynǵa taban tirese, 2011 jyly Andreı Zeıs kúmiske qol jetkizdi. Bir jyldan keıin Aleksandr Dıachenko jalpy esepte úzdik shyqty.
