Ulymdy qutqarǵan azamatqa shyn júrekten rızamyn! – deıdi órtten qutqarylǵan 12 jastaǵy balanyń ákesi

Ajaldyń aranynan jas balany  aman alyp qalý – ómir boıy este qalatyn erekshe erlik dep atasaq, esh qatelese qoımaspyz.

Kútpegen dabyl 101 telefonyna 27 qyr­­kúıekte saǵat 14.00-de tústi. Jýkov kóshe­si, 3 úı mekenjaıyndaǵy 6 qa­bat­­ty­ turǵyn úıdiń sońǵy qaba­tyn­da­ǵy páter­den ot laýlap jatqany habar­landy. Dereý jetken petropavldyq órt sóndirýshiler baspaldaq tambýryna­ jeter-jetpesten aldyńǵy esiktiń astynan býdaqtaǵan qalyń tútinge tap bolady. Ýly tútin páter turǵyndaryn, ásirese joǵarǵy qabattardaǵy jandardy evakýasııalaýǵa kedergi keltirdi. Soǵan qaramaı órt sóndirýshiler 12 turǵyndy, onyń ishinde 3 balany baspaldaqpen kóshege shyǵardy, al gazdy tútinnen qorǵaıtyn qorǵan-shlemderi bar top tútin burqyrap jatqan páterge kirdi.

«Páterdiń barlyq bólmesin qoıý tútin tumshalapty.  Shamasy jatyn bólme bolsa kerek, sol jaqta sha­tyr­lap jeke zattar janyp jatty. Biz bólmelerdiń birinde bala bar ekenin aldyn ala bildik, óıtkeni ol 101 qyzmetindegi dıspetcher Janerke Jıen­taevaǵa beıne-qońyraý arqyly ózi­niń qaı jerde ekenin kórsetken eken. Biz ony túkpir bólmede basyn buǵyp otyr­ǵan kúıinde taptyq. Birden terezeni sha­ǵyp, taza aýamen dem aldyrdyq. Qoly­nan jetelep, kireberisten shyǵarǵan soń jedel járdem qyzmetkerlerine tap­syr­dyq. Jolda ol múmkindiginshe tynysh­taldy. Osy kezde ózimniń úıde kú­tip otyrǵan úsh balam esime tústi», deı­di TJD О́rt sóndirý qyzmetiniń №2 maman­dandyrylǵan órt sóndirý bólimi bólim­she­si­niń komandıri, azamattyq qorǵaý aǵa ser­janty Balqat Tókın.

Elektr symdarynyń qysqa tuıyq­ta­lýynan tutanǵan órt 14 saǵat 34 mınýtta tolyq sóndirildi. Onyń shar­py­ǵan aýmaǵy 5 sharshy metrdi qurady.  О́rt­ sóndirýge jeke quramnyń 23 adamy jáne 7 birlik tehnıka jumyl­dy­ryl­dy.­ Túpkilikti sebep pen zalal aldaǵy ýaqytta anyqtalady.

Osylaısha, densaýlyǵyna áser etý dáre­jesin anyqtaý úshin aýrýhanaǵa jet­ki­zilgen 12 jastaǵy bala ajaldan qut­qa­ryldy. Qazir onyń ómirine qaýip joq.

Jábirlenýshiniń ákesi Iýrıı Grı­gore­vıch órt sóndirýshilerge shyn júrek­ten alǵysyn bildirdi. Ol «shyn júrek­ten» degen sózin kóp qaıtalap, «ulym­­dy qutqarǵany úshin rızamyn... Osy qyzmetke rahmet!» dep oblys orta­­lyǵynyń órt sóndirýshilerine rııa­syz kóńilden shyqqan rızashylyǵyn bil­dirdi.

Evgenıı JÝRAVLEV,

oblystyq TJD
qoǵammen baılanys tobynyń bas mamany

PETROPAVL