Sapardyń alǵashqy kúni Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń stýdentterimen kezdesý ótti. Stýdenttermen kezdesý barysynda Nurlan Ábdirov el Prezıdentiniń iske asyrylǵan Konstıtýsııalyq reformalary, aralas saılaý júıesiniń erekshelikteri, aýdandyq deńgeıdegi ákimderdi saılaý ınstıtýtyn engizý týraly keńinen aıtyp berdi. Stýdenttermen áńgimelesý barysynda OSK tóraǵasy halyqaralyq saılaýdy baıqaý taqyrybyn qozǵady. Ol EQYU/DIAQB Mıssııalarynyń elde ótken prezıdenttik jáne parlamenttik saılaýdy baıqaý jónindegi qorytyndy esepteri týraly aıtty. EQYU usynǵan usynymdarǵa berilgen otandyq ǵalymdar men sarapshylardyń baǵalaryna toqtaldy.
Munan keıin jınalǵan 70 stýdent onlaın daýys berýge belsendi qatysty. Máselen, respondentterdiń 34%-y qashyqtyqtan elektrondyq daýys berýdi engizýdi qoldaıdy, al 28,6%-y aralas elektrondyq daýys berýdi (stasıonarlyq, qashyqtyqtan) qolaıly dep sanasa, 77,1%-y el Prezıdenttigine kandıdat memlekettik tildi bilýi jáne lıngvıstıkalyq emtıhan tapsyrýy mindetti dep esepteıdi. Al respondentterdiń 48,6%-y sottylyǵy bar azamat Prezıdenttiń, depýtattyń, ákimniń saılanbaly laýazymdaryna usynyla almaıdy dep jaýap berdi.
Munan keıin Nurlan Ábdirovtiń Mańǵystaý aýdanyndaǵy №10 okrýg boıynsha shyǵyp qalǵan tulǵanyń ornyna aýdandyq máslıhat depýtatyn saılaýǵa daıyndyq pen ótkizý barysymen tanysty. Onyń tóraǵalyǵymen Shetpe kentinde keńes ótti, onda oblystyq jáne aýdandyq saılaý komıssııalarynyń, jergilikti atqarýshy jáne quqyq qorǵaý organdarynyń basshylary saılaýshylar tizimderi, saılaýdy uıymdastyrýshylyq, materıaldyq-tehnıkalyq qamtamasyz etý, múgedektigi bar 74 adamǵa saılaý ýchaskeleriniń fızıkalyq qoljetimdiligi úshin qajetti jaǵdaı jasaý, saılaý bıýlletenderin ýaqtyly jetkizý jáne saqtaý boıynsha júrgizgen jumystary týraly baıandama jasady. Keńesti qorytyndylaı kele, Ortalyq saılaý komıssııasynyń tóraǵasy Nurlan Ábdirov ýákiletti organdardyń nazaryn saılaý ýchaskelerindegi árbir saılaýshynyń konstıtýsııalyq quqyqtary men qoǵamdyq tártipti qamtamasyz etýge aýdardy.
Sonymen qatar N.Ábdirov saılaý komıssııalarynyń múshelerimen, jergilikti atqarýshy organnyń, aýdandyq prokýratýranyń, polısııa jáne tótenshe jaǵdaılar bólimderiniń ókilderimen Beıneý aýdany ákiminiń saılaýyn pılottyq rejimde uıymdastyrý máselelerine arnalǵan keńes ótkizdi. Keńeske qatysýshylar ózderiniń jetekshilik etetin salalaryna sáıkes júrgizip jatqan daıyndyq jumystary týraly baıandady. Keńes sońynda OSK tóraǵasy bul mańyzdy saılaý naýqany zańǵa qatań sáıkes júrýi jáne joǵary uıymdastyrýshylyq deńgeıde ótýi tıis ekenin atap ótti. Barlyq uıymdastyrýshylarǵa úlken jaýapkershilik júktelgen.
Mańǵystaý oblysy
