Aldymen Almatyǵa kóbinese Qytaı, Ispanııa, Germanııa, Brazılııa, Moldavııa, Reseı elderinen sálemdemeler, habarlar, banderolder men shaǵyn paketter keletinin aıta keteıik.
Almaty poshtasy dırektorynyń óndiris jónindegi orynbasary Nadejda Zabýrınanyń aıtýynsha, 2023 jyldyń 8 aıynda megapolıste 3 mln 900 myńnan asa hat-habar qabyldansa, shamamen onyń 30%-y halyqaralyq poshta eken. О́tken jylmen salystyrǵanda sálemdemeler men hattardy jiberý 20 paıyzǵa ósken.
Almaty qalasynyń ózinde apta saıyn 2 myńǵa jýyq hat tıisti oryndarǵa jetkizilip jatady. Eń qyzyǵy, almatylyqtar áli de merzimdi basylymdarǵa belsendi túrde jazylyp keledi. Bıylǵy 8 aıda megapolıs oqyrmandaryna 950 myń merzimdi basylym jetkizilse, jyl sońyna deıin bul san 1,5 mln danaǵa jetýge tıis.
Osy oraıda Qyzmetterdiń sapasyn baqylaý bóliminiń basshysy Zýlfıra Aıýpova jetkizý merzimi boıynsha únemi monıtorıng júrgizilip otyratynyn atady.
«Eger buryn Almaty turǵynynyń Astanaǵa attandyrǵan sálemdemesi 2-3 kún ishinde barsa, endi biz «týra sol kúni jetkizý» degen jańa qyzmet túrin engizdik. Bul úshin klıent saǵat 12.00-ge deıin «Qazposhta» bólimshesine barýy qajet», deıdi Z.Aıýpova.
Al endi Almaty poshtasynda 30 jylda ne ózgerdi desek, Almaty poshta úıiniń búginde 54 bólimshesi men júzdegen qyzmetkeri bar. Poshtashylar jyl saıyn mıllıondaǵan hattardy qabyldap, jiberedi jáne myńdaǵan sálemdemelerdi óńdeıdi.
Almaty poshtasynyń dırektory Altyn Sadyqova elektrondyq saýdanyń damýyna baılanysty sálemdeme jóneltilimderiniń aıtarlyqtaı óskenin málimdeı kele: «2015 jyldan bastap «Sálemdemeler sýpermarketi» jańa qyzmeti engizilgen edi. Bul – ózine-ózi qyzmet kórsetý rejiminde poshta jóneltilimderin berý bólimshesi. О́zine-ózi qyzmet kórsetý qaǵıdaty kezekterdi alyp tastaýǵa jáne sálemdemeni alý ýaqytyn qysqartýǵa múmkindik berdi. Qazirgi ýaqytta klıentter poshta jóneltilimderi týraly habarlamany kútpese de bolady. Eger klıenttiń telefon nómiri derekter bazasynda tirkelgen bolsa, uıaly telefonǵa sms habarlama keledi», dedi.
Sol sııaqty 2015 jyly «Pochtamattar» engizilgeni belgili. Bul – ınternet-dúkender men katalogterde tapsyrys berilgen taýarlardy berýge arnalǵan avtomattandyrylǵan termınaldar. Osy arqyly kem degende 8 saǵattyq jumys rejimimen balama jetkizý qyzmeti retinde jasalǵan.
Sondaı-aq qyzmetterdiń gıpermarketiniń rólin atqaratyn korporatıvtik ınternet portaly bar «post.kz» týraly da aıta ketken jón. Onlaın rejimde poshta jáne qarjy qyzmetterin paıdalanýshylar úshin portaldyń yńǵaılylyǵyn arttyrý jumystary únemi júrgiziledi. Bul júıe bank kartalaryn baılanystyra otyryp, jeke tulǵalar úshin ınternet-bankıngti júzege asyrýǵa múmkindik beredi. Sondaı-aq bólimshelerde tólemderdi qabyldaý boıynsha termınaldar ornatylǵan.
Spıkerdiń aıtýynsha, keıingi birneshe jyldaǵy úrdis dástúrli poshta kóleminiń jyl saıyn azaıyp kele jatqanyn kórsetip otyr. Osylaısha, gıbrıdti elektrondyq poshta (GEP) paıda boldy. Bul – paıdalanýshylarǵa elektrondyq túrde jekelegen kezeńderde jiberilgen habarlamalarmen nemese qujattarmen almasýǵa múmkindik beretin qyzmet. Qazirgi tańda osy úderiske jaýap retinde gıbrıdti jóneltý qyzmetteri usynylyp otyr.
Búginde «Qazposhta» 150-den asa elden sálem-saýqat qabyldap nemese keri attandyryp jatady. Al Almaty poshtasy keıingi otyz jylda dástúrli emes qyzmet túrlerin engizgen. Endigi jerde «Qazposhta» kórsetetin qarjylyq qyzmetter spektrine zańdy jáne jeke tulǵalarǵa esep aıyrysý-kassalyq qyzmet kórsetý, óz emıssııasynyń tólem kartochkalaryna qyzmet kórsetý men jalaqy berý, aqsha aýdarymdary, valıýta aıyrbastaý, halyqtan tólemderdi qabyldaý kiredi. Sondaı-aq nesıe berý, áýe jáne temirjol bıletterin satý boıynsha agenttik qyzmetter kórsetiledi. Oraıy kelip turǵanda «Qazposhta» 192 el kiretin dúnıejúzilik poshta odaǵynyń múshesi ekenin aıta ketýge bolady.
ALMATY
