Bıyl Taras Shevchenko atyndaǵy halyqaralyq syılyq álem ádebıetine qosqan zor úlesi jáne Ýkraına ádebıetin Qazaqstanda aıtarlyqtaı tanymal etkeni úshin jazýshy Rollan Seısenbaevqa berildi. Ýkraınanyń Halyqaralyq ádebıet jáne óner akademııasy belgilegen bul qurmetti syılyq kórnekti jazýshylarǵa, jýrnalısterge, aýdarmashylarǵa, ǵalymdarǵa, óner qaıratkerlerine, memleket jáne qoǵam qaıratkerlerine janqııarlyq, qoǵamdyq jáne qaıyrymdylyq qyzmetteri úshin beriledi.
Avtordyń «О́zimdi izdep júrmin», «Shaıtannyń taǵy», «Eshqaıda bastamaıtyn baspaldaqtar», «О́mir súrgiń kelse», «Qazybektiń oralýy», «Túngi dıalog», «Qum kezgen ólikter», taǵy basqa prozalyq, dramatýrgııalyq týyndylary oqyrmanǵa jaqsy tanys. Rollan Seısenbaev qalamger, aýdarmashy, baspager ǵana emes, belsendi qoǵam qaıratkeri ekenin de bilemiz. Ol Londonnyń tórinen Abaı úıin, Halyqaralyq Abaı klýbyn jáne «Amanat» halyqaralyq ádebı jýrnalyn ashty.
Rollan Seısenbaevtyń ádebıetke sińirgen eńbegin halyqaralyq deńgeıde moıyndaý onyń shyǵarmalarynda gýmanızm, beıbitshilik, izgilik, ádildik, jalpyadamzattyq qundylyqtar taqyryptaryn kóterýimen baılanysty bolsa kerek. Qazaq jazýshysymen birge bıyl Taras Shevchenko atyndaǵy syılyqtyń laýreattary tiziminde Ýkraınanyń halyq aqyny Vasılıı Sımonenko, sondaı-aq ýkraın aqyndary men aýdarmashylary Vasılıı Barka men Bogdan Boıchýk ta bar.
Jazýshy qaıratkerlik eńbegi úshin buǵan deıin de birneshe ret joǵary halyqaralyq marapatqa ıe boldy. Byltyr Halyqaralyq óner ortalyǵy «Radius» (AQSh), Halyqaralyq óner ortalyǵy «Pegasus Brucke», sonymen birge on memlekettiń halyqaralyq qoǵamdyq uıymdary Rollan Seısenbaevqa «Álemniń altyn jazýshysy» ataǵyn tabys etti. Bul joǵary ataq jazýshylardyń eńbekteri men qýatty shyǵarmashylyq umtylystary úshin taǵaıyndalǵan. Eske salsaq, amerıkalyq «Amazon Crossing» baspasynan avtordyń «Qum kezgen ólikter» roman-eposy jaryq kórgen bolatyn.
