«IV jazǵy Azııa paraoıyndar 22-28 qazan aralyǵynda Qytaıdyń Hanchjoý qalasynda ótedi. Jalpy, sportshylar 22 sport túrinen 564 júldeni sarapqa salady. Al bizdiń parasportshylar 14 sport túrinen 131 otandasymyz baq synaıdy. Sport túrlerine kelsek, paradzıýdo, parapaýerlıftıng, parajúzý, parakanoe, parajeńil atletıka, parataekvondo, paraoq atý, parasadaq atý, otyryp oınaý voleıboly, paraústel tennısi, paravelosport, paraakademııalyq esý, shahmat, bochcha sport túrleri bolady», dedi S.Quranbek.
Spıkerdiń aıtýynsha, Azııa paraoıyndar keshendi jarys bolǵandyqtan jaýapkershilik joǵary. О́ıtkeni Azııa paraoıyndarda reıtıng úshin upaılar jınalady. Sondaı-aq kelesi jyldyń maýsym aıyna deıin ótetin halyqaralyq básekelerde Parıj paralımpıadasynyń joldamasy sarapqa salynady.
«Osy kúnge deıin ulttyq qurama Azııa paraoıyndarǵa daıyndyqty pysyqtaý maqsatynda 14 sport túri boıynsha 40-tan asa oqý-jattyǵý jıynyn ótkizdi. Jıyn barysynda sportshylar qajet vıtamındermen qamtamasyz etilip, bapkerlermen qosa arnaıy kıim-keshekter jáne qural-jabdyqpen qamtyldy», deıdi ol.
Eske sala keteıik, 13 qazanda Almaty qalasynda el Ulttyq qurama komandasyn IV Azııa paraoıyndarǵa resmı shyǵaryp salý saltanatty rásimi boldy. Ulttyq quramasy 2010 jyldan beri Azııanyń paraoıyndarǵa tórtinshi ret qatysyp otyr. Azııa oıyndarynda júlde alǵan sportshylar men olardyń jattyqtyrýshylaryn aqshalaı yntalandyrý maqsatynda qurlyq chempıony atanǵan sportshyǵa 10 myń dollar kóleminde aqshalaı syıaqy beriledi. Al altyn medal ıegerin jarysqa daıyndaǵan jattyqtyrýshyǵa 5 myń dollar qarastyrylyp otyr. Qurlyq birinshiliginiń kúmis júldegeri 5 myń dollar, al jattyqtyrýshysy 3 myń dollar kóleminde syıaqy alady. Sondaı-aq qola medal enshilegen qurama sportshysyna 3 myń dollar, al onyń jattyqtyrýshysyna 2 myń dollar kóleminde aqshalaı yntalandyrý belgilengen.
Spıkerdiń aıtýynsha, jarysqa Azııanyń 43 elinen 4 myńǵa jýyq sportshy qatysady. Olar sporttyń 22 túrinen jalpy sany 564 medal (paralımpıadalyq sport túrinen – 490 jáne paralımpıadalyq emes sport túrinen – 74) jıyntyǵyn sarapqa salady. Azııa paraoıyndardy Azııanyń Paralımpıada komıteti retteıdi. Azııa paraoıyndarǵa deıin FESPIC (Múgedekterge arnalǵan Qıyr Shyǵys jáne Tynyq muhıty oıyndary) dep atalatyn qaýym bolǵan. Olar 1975 jyldan 2006 jylǵa deıin jumys istedi. Al Azııa paraoıyndardyń tarıhy 2010 jyldan bastaldy.
Azııa paraoıyndardy birinshi qabyldaýshy el – Qytaı, odan keıin Ońtústik Koreıa. Sońǵy oıyndar Indonezııanyń Djakarta qalasynda 2018 jyly ótti. Azııa paraoıyndarǵa qatysýshylar tek jazǵy sport túrlerinen baq synaıdy.
Oıyndardyń ashylýy men jabylýy saltanatynda elimizdiń týyn ustaýshylar – voleıboldan Azııa chempıonatynyń kúmis júldegeri parasportshymyz Janǵalı Súıeýov jáne paraústel tennısinen halyqaralyq jarystardyń chempıony Altynaı Erjanqyzy.
