Jıhaz jasaıtyn kásipker

Árıne, adam nege qabiletti sol baǵytta ónerin shyńdasa, ómirlik azyq bolary daýsyz. Biz kásip ıesiniń shańyraǵyna barǵanda osy oıdyń shyrmaýyna tústik. Áýeldi memlekettik qyzmetker bolýǵa bekingen Aıbolat aqyryndap bul jumystyń oraıyna kelmeıtinin ańdaıdy. Oqyp alǵan dıplomyn sandyqqa salyp, jeke kásipker bolýǵa bekinedi. Aǵash oıýdy, jonýdy bala kúninen serik etken keıipkerimiz kóp oılanbaı áke aqylymen jıhaz óndiretin shaǵyn sehtiń irgesin qalaıdy. Kóp uzamaı óndiristiń tolyq sıklin jolǵa qoıdy. Sóıtip, jas kásipkerlerge jiger berer memlekettik bastamalarǵa ıek súıep, kerek-jaraǵyn túgen­deı­di. «Damý» qory arqyly ne­sıe alyp, ákesiniń bastaǵan bız­ne­sin keńeıtýge nıet etken jas ká­sip­kerdiń bastamasy nátıjeli boldy. Ol sonymen qatar óz qarajatyna quny 18 mln teńgege jýyqtaıtyn zamanaýı stanoktar satyp alady.

Almatyda joǵary oqý ornyn bitirgen ekonomıst-menedjer Aıbolat Mahaı jıhaz jasaý­men aınalysqan ákesiniń isin jalǵastyrsam dep sheshti. Bú­gin­de Aıbolat Mahaıdyń bız­ne­sin tabysty ári turaqty deý­ge bolady. Kásiporyn jumys istegen 10 jyldan astam ýaqyt ishinde jergilikti turǵyndar men memlekettik mekemeler arasynda turaqty tutynýshylary qa­lyp­tasty. Turaqty eńbek ujy­my quryldy, tájirıbeli sheberler kelgen jas mamandardy oqytyp, úıretýdiń arqasynda qatarlaryn tolyqtyrdy. Balpyq bı aýylyndaǵy «Aıbolat» JShS jıhaz sehy – qazir óńirdegi eń iri sehtardyń biri. Aıyna keminde 10 tapsyrysty oryndaıdy.

«Kompıýtermen basqary­la­tyn arnaıy qytaılyq mashına­lar satyp alýdyń arqasynda qa­­zir sheberhanadaǵy qol eńbegi 50 paıyzǵa azaıdy. Bizde osyndaı 4 qurylǵy bar, olardyń quny 2,5 men 8 mln teńgeniń ara­ly­ǵynda. Osy qurylǵylardyń kóme­gimen kesemiz, tegisteımiz, plen­kamen qaptaımyz, órnekter salamyz. Boıaý jumystary qolmen atqarylady. Qurylǵylardyń eń jańalarynyń biri – bıyl satyp alǵan trımmer. Qalǵandaryn 2013, 2015 jyldary satyp aldyq. «Damý» qory arqyly 7 jylǵa 14 paıyz nesıe aldym, onyń 7 paıyzyn ózim tóleımin, qalǵanyn memleket sýbsıdııalaı­dy. Bul edáýir qoldaý boldy. Búgin biz shkaftardyń barlyq túrin, sondaı-aq ishki esikter shy­ǵaramyz. О́ndiriske arnalǵan mate­rıaldar men fýrnıtýrany Almaty qalasynan satyp áke­le­miz», deıdi jıhaz sehynyń dırektory A.Mahaı.

Onyń aıtýynsha, búginde ón­di­riske 4 adam tartylǵan, onyń ekeýi – naǵyz sheber. Jala­qy­la­ry 200 myń teńgeden asady. Oryndalǵan tapsyrystar sanyna baılanysty sheberlerge negizgi jalaqyǵa qosymsha bonýstar beriledi.

«Kúrdeliligine baılanysty bir tapsyrysty oryndaýǵa 7 kúnge deıin ýaqyt ketedi. Eger boıaý qajet bolsa, onda, odan da kóp ýaqyt jumsalady. Jalpy, bul salada 2005 jyldan beri júrmin. Alǵashynda Almatyda jumys istedim, ol jaqtan kóp nárseni úırendim, keıin týǵan jerime oralyp, jerlesterime kómektessem dep sheshtim. Osy sehta jumys istep júrgenime 10 jylǵa jýyqtady. Jumys jaqsy júrip jatyr. Jergilikti jas­tar­ǵa da mamandyǵy men turaqty tabysy bolýy úshin úıretýge tyrysamyn», deıdi seh sheberi Serik Smetuly.

Kóksýlyq kásipker jıhaz sehynyń ónimin jergilikti tur­ǵyn­­darǵa ǵana emes, Taldy­qor­ǵanǵa da satady.

«Aıbolat» JShS aldaǵy ýa­qytta tenderlerge qatysýǵa nıet­ti. Kásipker úlken tapsyrys­tar­dy oryndaýǵa óziniń de, ko­man­da­synyń da tájirıbesi, qural-jabdyqtary men múmkindikteri jetetinine senimdi.

«Biz jıhazdy ár satyp alý­shy­nyń qalaýy men múm­kin­dik­terine qaraı, ári túrli modıfıkasııa men konfıgýrasııaǵa súıene otyryp jasaımyz. Kóbinese klıentter ózderiniń ıntererine saı dızaın men tústerdi usynyp jatady. Biz ólshem jasaýdan bastap daıyn ónimdi jetkizýge deıin túgel bastan-aıaq atqaramyz. Biz óz taýarlarymyzdyń sapasy men qyzmet etý merzimderine kepildik beremiz», deıdi jıhaz sehynyń dırektory Aıbolat Mahaı.

Kóksý aýdany ákimdiginiń má­li­metinshe, aýdanda 3 950 kásip­ker bar, olar negizinen aýyl shar­ýa­­shylyǵy, qyzmet kórsetý, ta­maq­taný, jeńil ónerkásip, týrızm salalarynda eńbek etedi. 2023 jyldyń qańtar-tamyz aılarynda Jetisý oblysynda jumys istep turǵan ShOB sýbektileriniń sany 59,7 myń birlikke jetken. О́nim men kórsetilgen qyzmet kólemi 133 mlrd teńgeden asty. Bul rette 2023 jylǵy qańtar-tamyzda bıýdjetke salyq túsimderi 2022 jyldyń osyndaı kezeńimen sa­lys­tyrǵanda 46,7 paıyzǵa ul­ǵa­ıyp, 27,7 mlrd teńgeni qu­ra­ǵan. Bul rette Taldyqorǵan qalasy men 7 aýdan oń ósim kórsetse, sonyń ishinde Kóksý aýdany bul kórsetkishti 2,4 esege ulǵaıtqan.

О́ńir ákiminiń baspasóz qyz­me­tiniń málimetinshe, 2023 jylǵa arnalǵan kásipkerlikti damytý jónindegi ulttyq joba aıasynda Jetisý oblysyna 6,8 mlrd teńge bó­lindi, jalpy kredıttik soma­sy 15 mlrd teńgege 335 joba ma­qul­dan­dy.

Jetisý oblysy