Respýblıka kúni merekesi aıasynda Taraz qalasy ákimdigi men qalalyq ardagerler keńesiniń birlese uıymdastyrýymen «Qyzdarǵa ásemdik jarasady» atty maqtaýly, shashbaýly arýlar arasynda baıqaý ótti. Is-sharaǵa arnaıy qatysqan Taraz qalasy ákiminiń orynbasary Dáýir Dáýletov baıqaýdyń mańyzyna toqtaldy.
«Rasynda da, qazaq halqy qyz balasyn qatty qadirlegen. Tipti babalarymyz názik jandylardyń boıynan árdaıym sulýlyqpen qatar ádeptilikti, ımandylyqty izdegen. Sulýlardyń boıyna sol izgi qasıettiń bárin ardaqty analar darytyp otyrǵan. Respýblıka kúni merekesi aıasynda ótkizilip otyrǵan «Qyzdarǵa ásemdik jarasady» baıqaýynyń taǵylymy tereńde jatyr. Baıqaý barysynda arýlarymyzdyń boıynan túrli ónerdiń ushqynyn ańǵardyq. Qazaq arýyna tán dástúrdiń jalǵasyn kórdik. Osyndaı is-sharalar kezinde qarakóz qaryndastarymyzdyń tanymy men bilimin, boıǵa jıǵan ádebi men ımanyn baıqaımyz. Sol turǵydan kelgende baıqaý kóptiń kóńilinen shyqty», dedi D.Dáýletov.
«Men qazaqtyń qyzymyn dara týǵan», «Uıada ne kórseń, ushqanda sony ilesiń», «Bilikti qyz», «Qyz ósse, eldiń kórki» syndy kezeńderden quralǵan baıqaý qorytyndysynda Taraz ınnovasııalyq kópsalaly kolledjiniń úmiti Damıra Meıirqulǵa birinshi oryn buıyrsa, M.H.Dýlatı atyndaǵy Taraz óńirlik ýnıversıteti atynan synǵa túsken Qaraqat Meırambek ekinshi orynǵa, Sh.Murtaza atyndaǵy Taraz ınnovasııalyq ınstıtýtynyń stýdenti Bafarýza Baltabaı júldeli úshinshi orynǵa laıyq dep tanyldy. Sondaı-aq birneshe qatysýshy arnaıy atalymdar boıynsha marapattaldy.
TARAZ
