Foto: Sportty damytý dıreksııasy
Kýmıte baǵdarlamasynda Qaısar Alpysbaı jartylaı fınalda álem chempıony Andjelo Kreshensony (Italııa) 5:1 esebimen utty. Endi ol altyn medal úshin grekııalyq Hrıstos-Stefanos Ksenospen saıysady.
Aıta ketsek, Q.Alpysbaı qazir WKF karateden álem reıtınginde 7-orynda tur. Ol – Premer-lıga sanatyndaǵy básekede 3 márte top jarǵan jáne bıyl ótken Azıadanyń chempıony.
Al Móldir Jańbyrbaı álem reıtınginiń kóshbasshysy Venesýela karateshisin aıqyn basymdyqpen tizerletip (11-3) sensasııa jasady. M.Jańbyrbaı jýyrda Azıadadan elge kúmis júldemen oralǵan.
Sondaı-aq jeksenbi kúni Dıdar Ámiráli (67 kg) jáne Sofıa Berýlseva (+68 kg) qola medal úshin jekpe-jekter ótkizedi.
WKF karateden Halyqaralyq dárejedegi tóreshi, Ulttyq quramanyń bas bapkeri qyzmetin atqarǵan Asqar Moldaǵalı Sportty damytý dıreksııasynyń baspasóz qyzmetine bergen suhbatynda: «Bul elimiz úshin tarıhı sát! Alǵash ret eki sportshymyz álem chempıonatynyń fınalynda. Osyǵan deıingi iri jetistigimiz – Darhan Asadilovtiń 2008 jyly alǵan kúmis medali edi. Eki fınalmen qosa eki qola úshin jekpe-jek kútip tur. Jalpy eresekter arasynda bizden WKF karateden álem chempıony shyqpaǵan. Jastar, jasóspirimder sanatynda jeńimpazdar bar. Sátin salyp, elge eki altynmen qaıtýǵa barymyzdy salamyz», dedi.
Eske salaıyq, WKF karateden Ulttyq qurama XIX jazǵy Azııa oıyndaryna 8 sportshy aparyp, barlyǵy júldege ıe bolǵan (3 altyn, 3 kúmis, 2 qola). Sondaı-aq bıyl Azııa chempıonatynda alǵash ret jalpy esep boıynsha top jardy.
Anyqtama retinde aıta ketsek, Qazaqstan osyǵan deıingi álem chempıonattarynda 1 kúmis pen 10 qola enshilegen.
