Foto: ashyq derekkóz
«Aýrý juqtyrýdyń jergilikti jaǵdaıy anyqtaldy. Jeke aýlada qojaıyndary 8 aılyq buqany soımaqshy bolǵan. Iesiniń aıtýynsha, mal aýyrǵan. Biraq etin satýdy josparlamaǵan. Sol aýladaǵy úsh adamnan sibir jarasy anyqtaldy, taǵy eki adam dárigerlerdiń baqylaýynda. Sondaı-aq olarmen baılanysta bolǵan 30 adam anyqtalyp, profılaktıkalyq is-sharalar týraly túsindirme áńgime júrgizilip, medısınalyq baqylaý ornatyldy», delingen oblys ákimdigi taratqan habarlamada.
«Barlyq tekserilgen oshaqtarda dezınfeksııa júrgizildi, veterınarııa mamandary úılerdi aralap, maldardy klınıkalyq tekserý jáne termometrııa ótkizip, egý jumystaryn júrgizip jatyr. Aýyl sharýashylyǵy mınıstrligi Veterınarııalyq baqylaý jáne qadaǵalaý komıteti arqyly veterınarııalyq preparattardyń respýblıkalyq qorynan vaksınalar men dezınfeksııalyq quraldarǵa qajettilik tolyq qamtamasyz etildi», deıdi aýmaqtyq vetınspeksııa basshylyǵy.
Endi, eldi mekennen mal jáne sút ónimderin alýǵa jáne kirgizýge qatak tyıym salyndy. Mal soıýǵa da, atalǵan aýmaqtan jem-shóp tasýǵa da ruqsat joq.
«Qarasan» juqtyrǵan degen dıagnozben oblystyq klınıkalyq aýrýhanaǵa túsken tórt naýqas túsken.
– Bizdiń ortalyqqa «Qarasan» degen dıagnozben tórt adam tústi. Onyń úsheýinen «Qarasan» anyqtaldy. Bireýiniń analız qorytyndysyn kútip otyrmyz. Onyń úsheýi de bir otbasynyń adamdary. Naýqastyń bireýi jansaqtaý bóliminde. Jaǵdaıy aýyr. Naýqastyń jaǵdaıyna baılanysty óńirdegi bilikti dárigerlerdiń qatysýymen respýblıkalyq konsılıým ótti. Al, eki naýqas basqa bólimde. Jaǵdaılary – ortasha. Qazir tıisti em-sharalar qoldanylyp jatyr, – dedi oblystyq klınıkalyq aýrýhananyń ınfeksııalyq ortalyǵynyń jetekshisi, Qaraǵandy medısına ýnıversıtetiniń ınfeksııalyq aýrýlar kafedrasynyń qaýymdastyrylǵan professory Erjan Júnisov.
Professor álginde ǵana aıtqan tórtinshi pasıenttiń taldaý nátıjeleri aýrý belgileri anyqtalmaǵanyn aıǵaqtady. Degenmen, naýqas profılaktıkalyq em alý úshin ınfeksııalyq bólimde taǵy 5 kún bolady.
Qaraǵandy oblysy
