Mereke baspana toıyna ulasty

Oblys ákimi Ermaǵanbet Bó­lekpaev kezekte turǵan kóp­balaly otbasylarǵa, balalar úıiniń túlekterine jáne ata-ana qamqorlyǵynsyz qalǵan balalarǵa jańa páter kiltin tabystady. Kópqabatty úı Maı­qudyq shaǵyn aýdanyndaǵy Belınskıı 1/1 mekenjaıynda ornalasqan.

– Respýblıka kúni qarsańynda kópten kútken baspanalaryńyzǵa qol jetkizdińizder. Osynaý qýa­nyshpen shyn júrekten quttyq­taımyn. Aıtýly kúni 72 páter úlestirildi. Munymen qosa aı­maq­taǵy aýdan-qalalarda da jańa baspana kilti tabystalyp jatyr. Jańa úılerińizge jan tol­syn. Ishine baqyt ornasyn, – dedi aımaq basshysy quttyqtaý sózinde.

Oblys ákimi óz úıin uzaq kút­ken kóp­balaly ana Anargúl Syzdyqbekovanyń úsh bólmeli páterindegi alǵashqy qonaq boldy. Kópbalaly ana 2010 jyldan beri kezekte turǵan.

– Páter qurylysy memle­kettik stan­darttarǵa saı salyn­ǵan. Men 13 jyl kezekte turdym. Osy ýaqytqa deıin tórt balamen baspana jaldap turdyq. Shydadyq. Ońaı bolǵan joq. Endi jańa qonys jańa tabystarǵa jeteleıdi degen úmitimiz bar. Úıi­mizdiń ishi qýanysh pen bala­lar­dyń kúlkisine tolsyn dep ti­leımiz, – dedi páter ıesi A.Syz­dyqbekova.

«Kúmis alqa» ıegeri Lázzat Naýryzbaeva ju­baıymen birge alty bala tárbıelep otyr. Bul otbasy 2013 jyldan beri páter kezeginde tur­ǵan.

– Biz de uzaq jyldar boıy bas­pana jal­dadyq. Biraz qınaldyq, sebebi kóp páter ıesi bizdiń úl­ken otbasymyzǵa úıin jalǵa bergisi kelmedi. Ári-beri kóshý ońaı emes. Endi bári artta qaldy, biz baqyttymyz, shúkir, – deıdi L.Naýryzbaeva.

Jańa baspanaǵa qoly jetken Natalıa Zımına – balalar úıiniń túlegi. Ol óz páte­rin 2007 jyldan beri kútken. «Balalar úıinen keıin birden baspana jaldadym. Al­ǵashqy jyldar óte qıyn boldy. Aqsha jetispegendikten páterdi jıi aýystyrýǵa týra keldi. Maǵan úı beriletinin alǵash aıtqan kezde sene almadym. О́tken kúnderim kórgen tústeı artta qaldy. Eki kishkentaı qyzym jańa úıimizge kóshýge asyǵyp júr, – deıdi N.Zımına.

Dál osy kúni Qaraǵandynyń ındýs­trıaldyq aımaǵy sanalatyn Saran qala­synyń 100 turǵyny da jańa baspanaǵa qol jetkizip, baqytqa bólen­di. Qalanyń «1a» shaǵyn aýda­nyndaǵy jańa bes qabatty úı «Nurly jol memlekettik baǵdar­lamasy» boıynsha salynǵan. Jańa úıge kezekte turǵan kóp­balaly jáne tolyq emes otbasylar, erekshe qajettilikteri bar jandar men jetim balalar qonystanady. Jańa úı bir, eki jáne úsh bólmeli páterlerden turady. Tek úı ishin jıhazben jabdyqtaý ǵana qaldy. Tipti aýlasy abattandyrylyp, ba­la­­lardyń oıyn alańy da orna­tylǵan.

Sý jańa páter ıesiniń biri Zoıa Zardhannyń tórt balasy bar. Osy ýaqytqa deıin olar páter jaldap kelgen. Degenmen óz úıi bolatynynan úmit úzbegen.

– Osydan on jyl buryn, ıaǵnı 2013 jyly men bıýdjet qyzmetkeri retinde kezekke tur­dym. Al 2021 jyly men tórtinshi balamdy dúnıege ákeldim, meni kópbalaly ana retinde basqa kezekke aýystyrdy. Eń úlkenim – qazir 14 jasta. Balalar bizge páter berilgenin bilgen­de qatty qýan­dy. Endi olar osy úıge kó­shýimizdi taǵatsyzdana kútip júr. Munda balabaqsha, mektep ja­qyn jerde ornalasqan eken. Bul jaǵy da yńǵaıly boldy, – deıdi Z.Zardhan.

Mundaı qýanyshty temirtaý­lyq kezekte turǵan jandar da sezindi. Qurysh qaladaǵy 65 ot­basy qonystoıdy atap ótedi. «Qýatty óńirler – eldi damytý­dyń draıveri» ulttyq jobasy aıasynda Mendeleev kóshesi, 6/2 mekenjaıyndaǵy 65 páterli úı satyp alyndy. Jańa úıge qonys aýdaratyndardyń biri – Elena Sımonova. Jubaıy ekeýi segiz bala tárbıelep otyr.

– Bizdiń otbasymyzda bala kóp bolǵannan, páter jalǵa bere­tinder óz oıynan aınyp qalatyn. Úılerin bergisi kelmeıtin. Biz­ge ońaltý ortalyǵynyń ǵı­ma­ra­ty­nan ýaqytsha baspana berildi. Osy kúnge deıin biz sol jerde ómir súrip keldik. Mine, endi jaıly, jaryq úsh ból­meli páterimiz bar. Úshinshi qabattan berilgenine de erekshe qýanyshtymyz. Jyp-jyly. Jaqynda kóship kelemiz. Osyn­daı keremet syılyq úshin memle­ketimizge úlken alǵys aıtamyz, – dedi E.Sımonova.

Balalar úıiniń túlegi Gúlim Dúısekova 13 jyl boıy úı keze­ginde turǵan. Osy ýaqytqa deıin jataqhanada bólme jaldap kelgen. «Bir bólmeli páterim bar. Jap-jańa. Keń. О́zime erekshe unady. Kóship kelýge asyqpyn. Kórshilerimmen jaqyn tanysyp aldym. Qazaqta «úı salmas buryn kórshińdi saılap al», degen sóz bar ǵoı. Keremet jandar eken», dep shattyǵymen bólisti jańa páterdiń ıesi.

Shahtınsk qalasynyń 60 tur­ǵynyna da páter kiltteri tabys­taldy. «Kazdorstroıteh» JShS kompanııasy salǵan bes qabatty turǵyn úı áleýmettik osal top­taǵy jandarǵa buıyrdy. Atap aıtar bolsaq, 7 páter kópbalaly otba­sylarǵa, 37 páter múmkindigi shekteýli jan­darǵa, 16 páter je­tim balaǵa berildi.

Shahtınsk qalasynyń turǵyn úı-kom­mýnaldyq sharýashylyq, jolaýshylar kóligi jáne avto­mo­bıl joldary bólim bas­shy­synyń mindetin atqarýshy Azat Aıtyshovtyń aıtýynsha, jaqyn arada taǵy 24 páter tabys etilmek. Onyń ishinde 12 páter respýb­lıkalyq bıýdjet esebinen, taǵy 12 páter jergilikti bıýdjet esebinen satyp alynyp, jóndeý jumystary júrgizilip jatyr.

Aıtýly mereke qarsańynda aımaǵy­myzdyń qalalarymen qatar, aýdandarynda da pá­ter kiltteri tabystaldy. Shet aýda­nynda 24 otbasy jáne Nura aýdanynda 35 otbasy baspanaly boldy. Onyń ishinde Shet aýda­nyndaǵy Aqsý-Aıýly aýylynda 4 otbasy, Aǵadyr kentinde 16 shańyraq jáne S.Seıfýllın kentinde 4 otbasy jańa úıge qonys aýdarady.

Osylaısha, Respýblıka kúni qarsańynda birneshe qaraǵan­dylyq qýanyshqa bólendi. Aldaǵy ýaqytta da úı kezeginde turǵan jan­darǵa jańa shańyraqtyń kil­tin tabystaý jalǵasa beredi.

Qaraǵandy oblysy