Ardagerler senatormen suhbat qurdy

Osy jıynnyń qur­metti qo­naǵy retinde Par­lament Sena­­ty­nyń depýtaty, hımııa ǵylym­­da­rynyń doktory, professor, UǴA kor­­respondent-mú­­shesi Altynbek Nuhuly shaqy­ryl­­dy. Ol ardagerlerdi merekemen quttyqtap, Alash azamattarynyń tulǵasyn ashatyn mazmundy áńgime órbit­ti. Sonymen qatar tuń­ǵysh akade­mı­gimiz Qanysh Sátbaevtaı tul­ǵalardyń eń­be­gin ulyq­taý­dy da sóz etti.

Basqosý barysynda se­na­torǵa jınalǵan qaýym túrli suraq qoıdy. Bul rette qoǵamda bolyp jat­qan keleńsiz jaıttar, bilim, oqý­lyq­­tardyń sapasy, mek­tep­tegi býllıng máselesi kóterildi.

Bul kezdesýge senator ákim­diktiń usynysymen emes, ardagerlerdiń sha­qyrýymen keldi. Ol – týǵan jerine týyn tikken azamat. Parasatty, adamı qasıeti mol qaıratker. Jýrnalıst retinde bile­tinim, ol týǵan jeri Baıanaýyldyń Teńdik aýy­lynda «Asyl murasyn asqaqtatqan babalar» atty memorıaldyq ke­shen­niń qazyǵyn ornatyp, ata-babalar rýhyna arnap aýylynda bir jyldary as berdi. Kezinde MáshHúr Júsip atamyzǵa úlken kesene salý jó­nin­de usynys jasap, demeýshiler taýyp, ózi de qarjylaı kómektesken edi. Pavlodardaǵy peda­go­gıkalyq ýnıver­sı­tettiń rektory qyz­me­tinde júr­gende Musa Shormanuly, Ábikeı Sát­baev, Buhar jyraý, Máshhúr Júsip, Júsipbek Aımaýytuly, Sultanmahmut Toraı­ǵyr­uly, Qanysh Sátbaev, Álkeı Marǵulan, Shapyq Shókın, Ermuhan Bek­ma­hanovtardyń eskertkish-bıýsterin oqý orny aldyna ornatty. Altekeńniń taǵy bir úlken jumysy – ádebıet pen ónerimizge eńbegi sińgen adamdar týraly «Ertis-Baıan óńiriniń 100 tarıhı tulǵasy» atty qysqametrajdy fılm da­ıyndatty. Qazaqtyń táýel­sizdigine úles qos­qan Pav­lodar óńirinen shyqqan 100 ataqty adam týraly derekti fılm búginde óńir­de ǵana emes, respýblıka kóleminde baǵasyn alyp, altyn qorda saqtalyp tur.

Al endi Astana­nyń tórinde boı kótergen aka­de­mık Qanysh Sát­baev­tyń eskert­ki­shiniń turǵyzylýyna úles qo­syp, de­meý­­­shi­ler tapqan da – Altynbek Nuhuly. Ult ustazy, Alash­tyń kóshbasshy­la­ry­nyń biri Ahmet Baıtur­sy­nulynyń 150 jyl­dyǵyn atap ótýdi Par­lament minberinen kóterip, osy mereıtoıdy uıymdastyrýǵa belsene qatysty. Sondyqtan eldiń aldynda joǵary deń­geıdegi bastamalarǵa atsa­ly­syp júrgen osyn­daı tulǵanyń jurt­shylyqqa aıtary da mol. Bul kezdesý osynysymen de mándi.

Atalǵan jıynǵa As­ta­na qa­lalyq ardagerler keńesi tóra­ǵasynyń oryn­basary Satybaldy Ju­ma­ǵatov, saıasattaný doktory Ábdijálel Bákir, qalamger Baıan­dy Álpı, Astana qa­lalyq Bı­ler keńesiniń tóraǵasy Ánýarbek Eraly, Almaty aýdany Arda­gerler keńe­siniń tóraǵasy Murat Mustafın, Baı­qońyr aýda­ny Ar­da­ger­ler keńesiniń tóraǵasy Qýanysh Namaz­sham, Almaty aýdany Aq­sa­qal­­dar keńesiniń tóra­ǵasy Amankeldi Áshirov, taǵy basqa zııaly qaýym ókilderi qatysty. Al bas­qosýǵa – Baı­qońyr aýdany «Belsendi uzaq ómir súrý» ortalyǵynyń qazaq tili pániniń muǵalimi Marjan Pirimbetova mo­deratorlyq etti.

Ǵalııa BALTABAI,

ardager jýrnalıst