Foto: Jaslan Jumabekov
Májiliste ótken «AMANAT» partııasy fraksııasynyń keńeıtilgen jıynynyń qorytyndysynda depýtattar «2024-2026 jyldarǵa arnalǵan respýblıkalyq bıýdjet týraly» jáne «Qazaqstan Respýblıkasynyń Ulttyq qorynan 2024-2026 jyldarǵa arnalǵan kepildendirilgen transfert týraly» zań jobalaryn qarady. Atalǵan zań jobalarynda Prezıdenttiń Joldaýyn jáne Saılaýaldy baǵdarlamasyn, sondaı-aq «AMANAT» partııasynyń saılaýaldy baǵdarlamasyn iske asyrý qamtyldy.
Depýtattar jıynda Kostenko atyndaǵy shahtada qaza tapqan kenshilerdi bir mınýt únsizdikpen eske aldy. Májilistegi «AMANAT» fraksııasynyń jetekshisi Elnur Beısenbaev depýtattar memlekettiń halyq aldyndaǵy áleýmettik mindettemelerin, onyń ishinde jalaqy men zeınetaqyny ındeksteý, járdemaqylardy kóbeıtý, medısınalyq kómekti qamtamasyz etý sııaqty basqa da basymdyqtardy oryndaýǵa erekshe nazar aýdarǵanyn aıtty. Premer-mınıstrdiń orynbasary – Qarjy mınıstri Erulan Jamaýbaev respýblıkalyq bıýdjettiń 2024 jylǵa arnalǵan shyǵystary 24 trln teńge deńgeıinde dep boljanyp otyrǵanyn jetkizdi. Transfertterdi esepke almaǵanda kiristiń kólemi 16,1 trln teńgege jetedi dep josparlanyp otyr.
«Bıýdjet jobasy Memleket basshysynyń Joldaýyn jáne Saılaýaldy baǵdarlamasyn, sondaı-aq «AMANAT» partııasynyń saılaýaldy baǵdarlamasyn oryndaý jónindegi Jol kartasyn iske asyrýdy eskere otyryp jasaldy. Bul jumys Úkimettiń erekshe baqylaýynda. Májilismenderdiń tikeleı aralasýymen 2,4 trln teńgege jýyq qarajat mańyzdylyǵyna qaraı qaıta qarastyryldy. Bul óte tyńǵylyqty ári júıeli jumys boldy. О́ńirlerdi damytýǵa 2024-2026 jyldarǵa 7 trln teńge qarastyrylǵanyn» aıtqan vıse-premer «Aýylda densaýlyq saqtaýdy jańǵyrtý» ulttyq jobasyn iske asyrýǵa 2,4 trln teńge bólip, 2025 jylǵa deıin 655 densaýlyq saqtaý nysanyn salý jáne 32 aýdanaralyq aýrýhanany jańǵyrtý josparlanǵanyn jetkizdi. «Jaıly mektep» ulttyq jobasyna 1,7 trln teńge baǵyttalyp, bul aqsha 369 mekteptiń qurylysyna jumsalmaq. Jıynda Májilis depýtaty, «AMANAT» fraksııasynyń múshesi Marhabat Jaıymbetov bıýdjet jobasyn ázirleý barysynda depýtattar memlekettik organdardan qosymsha málimetter alý úshin 200-den astam saýal joldaǵanyn jetkizdi. Sondaı-aq zań jobalaryna 300-ge jýyq túzetý engizgenin, «bıýdjettiń shyǵystaryn bıýdjet tapshylyǵyn ulǵaıtý jáne Ulttyq qordan beriletin transfertter esebinen jabý úrdisi saqtalǵanyn» málim etti.
Májilis Spıkeri, «AMANAT» partııasynyń Tóraǵasy Erlan Qoshanov Ulttyq qor qarajatyn utymdy jáne tıimdi paıdalanýdyń mańyzy zor ekenin aıtty. «Memleket basshysy Úkimetke Ulttyq qordan transfertterdi qysqartýdy jáne bıýdjet tapshylyǵy máselesin únemi onyń qarajaty esebinen sheshpeýdi birneshe ret tapsyrdy. Kiris bóligin tolyqtyrýǵa arnalǵan rezerv máselesin ekonomıkanyń barlyq sektoryndaǵy tıimsiz shyǵyndardy ońtaılandyrý arqyly sheshý kerek. Kelesi jyldan bastap «Ulttyq qor – balalarǵa» baǵdarlamasy jumys isteı bastaıdy. Endi Ulttyq qordan aqsha bólý týraly kez kelgen aqparatqa tólem alýǵa úmitker balalardyń ata-analary qatty nazar aýdarady. Bul óte sezimtal másele jáne oǵan óte muqııat qaraý kerek», dedi E.Qoshanov. Partııa Tóraǵasy Qaraǵandydaǵy kenshiler qaza tapqan qaıǵyly oqıǵa ónerkásip qaýipsizdigin qamtamasyz etýde máseleniń shash-etekten ekenin aıtty. Májilis spıkeri bıýdjet jobasyn qaraǵanda azamattar aldynda aıtylǵan ýádeniń oryndalýy qatań qadaǵalanatynyn da atap ótti.
«Depýtattar zań jobasyna 1,7 trln teńgeni quraǵan arnaıy túzetýlerge usynystar berdi. Bıyl biz rekordty jańarttyq dep aıta alamyz. Bıýdjet qarajaty Memleket basshysynyń Joldaýynda, Prezıdenttiń saılaýaldy baǵdarlamasynda jáne partııanyń saılaýaldy baǵdarlamasynda belgilengen sharalardy ýaqtyly jáne sapaly oryndaýǵa arnalǵan. Bul bizdiń Úkimetpen birge halyq aldyndaǵy ortaq jaýapkershiligimiz», dedi E.Qoshanov.
