– Qazir munda 12 qyzmetkerge arnaıy shtat bólindi. Kelesi jyly mamandar sanyn arttyrý josparymyzda bar. Jyl basynan beri aýdan ákimi Dildábek Orazbaev osy ıgilikti istiń oryndalýyna tikeleı uıytqy bolǵanyn jurt jaqsy biledi. Qazir balalardy asyq, toǵyzqumalaq, bestas, doıby oıyndaryna úıretetin mamandar jumysyn bastady. Odan bólek oqýshylarǵa kókpar, aýdaryspaq, jamby atý sııaqty ulttyq at sporty oıyndarynyń tártibi men teorııasy túsindiriledi. Ulttyq sport oıyndaryn budan ári dala tósinde erkin damytyp, el abyroıyn arttyrýǵa bárimiz de atsalysamyz, – deıdi Ulttyq sport oıyndary ortalyǵynyń basshysy Baýyrjan Túsipjanov.
Kókpektide at sporty oıyndarynan erekshe jolǵa qoıylǵany kókpar ekenine daý joq. Aýdan boıynsha «Kókpekti-1», «Kókpekti-2» degen eki komanda qurylýy sonyń basty dáleli. Ortalyqtyń ashylý saltanatynda sóz alǵan aýdan ákimi D.Orazbaevtyń aıtýynsha, jasynan at jalyna jarmasyp, qulaǵynda oınap ósken balanyń Otan qorǵaýǵa degen qushtarlyǵy zor bolmaq. Sol sebepten de at ustap, júırik baptaýdyń ózi úlken óner. Qazir Kókpekti aýdanynyń aýyldarynda jylqy basyn kóbeıtip, tuqymyn asyldandyrýǵa da den qoıa bastaǵandar jeterlik.
Aýdan tórindegi atalǵan ortalyqtyń ashylý saltanatynan keıin Kókpekti aýylynyń shetindegi ıppodromda «Tolaǵaı» ulttyq at sporty oıyndarynyń kórigi qyzyp júre berdi. Komandalyq kókpar boıynsha 1-orynǵa Maqanshy aýylynan kelgen (Úrjar aýdany) kókparshylar qol jetkizse, 2-oryn tarbaǵataılyq sportshylarǵa buıyrdy. 3-oryndy at sporty oıyndarynyń ótýine uıytqy bolǵan kókpektilik kókparshylar enshiledi.
Odan keıingi at jarysyn da jurt qyzyǵa tamashalady. 15 shaqyrymdyq top báıge men 25 shaqyrymdyq alaman báıgede de Kókpekti aýdanyndaǵy «Talap» sharýa qojalyǵynyń basshysy Rýslan Shaıyrǵazınniń qos júırigi qara úzip dara keldi. At sporty oıyndaryna qatysqan jeńimpazdardyń barlyǵy da qarjylaı júldege ıe boldy.
Jarysty uıymdastyrýshylardyń aıtýynsha, ulttyq at sporty oıyndary dástúrli túrde jyl saıyn ótetin bolady.
