Bul baǵdarlamada keıipkermen tek suhbat qurylyp qana qoımaı, kelgen qonaqtyń armandaǵan dúnıesine qol jetkizip, bir sát sezinýine múmkindik beriledi.
Túsirilim barysynda Roza Qýanyshqyzy Almaty-2 jáne Almaty-1 stansııalary aralyǵynda jolserik rólin atqardy. Bul az ǵana sapar kezinde jolserik rólindegi súıikti ánshilerin kórgen jolaýshylardyń qýanyshynda da shek bolmaǵan. О́zi de temirjolshynyń qyzy bolǵan ánshiniń bul mamandyqty armandaýy teginnen tegin bolmasa kerek.
Aıta keteıik, Roza Rymbaeva burynǵy Semeı oblysy Jarma aýdany Jańǵyztóbe stansııasynda temirjolshy otbasynda dúnıege kelgen. Kúni-túni jolaýshylar jáne júk poıyzdary ersili-qarsyly ótetin stansııada toqtaǵan vagondardy, aıaldaǵan jolserikterdi kórip, forma kıgen temirjol qyzmetkerlerine qyzyǵýy zańdy da. Onyń ústine únemi jumysta bolatyn ákesin úıge kelgende qýana qarsy alyp, temirdeı tártipke negizdelgen qyzmetiniń aýyrlyǵy da, jaýapkershiligi de zor ekenin sezinip ósedi. Degenmen temirjolshy Qýanysh Rymbaevtyń 8 balasynyń kóbi ónerge jaqyn bolyp, sonyń ishinde Roza qazaq án ónerinde juldyz bolyp jarqyrady.
Baǵdarlamanyń sátti shyǵýy úshin telearna ujymy «QTJ» UK» AQ-dan poıyzdaǵy túsirilimdi uıymdastyrýǵa kómek suraǵan. Osylaısha Almaty-Shamalǵan nemese Almaty-Qapshaǵaı baǵytyndaǵy jolaýshylar poıyzyna ruqsat alǵan túsirilim tobyna QTJ, ıaǵnı «Jolaýshylar tasymaly» AQ tarapynan ánshiniń dene ólshemine sáıkes jolserik kıimi usynylǵan. Sonymen qatar temirjolshylar ánshige jolseriktiń jumysyn túsindiretin nusqaýlyq bergen. Osylaısha bala kúngi armany temirjolshylardyń qoldaýymen bir sátke oryndalyp qýanyshqa bólengen ánshi bolat joldaǵy barlyq qyzmetkerlerge alǵysyn bildirdi.
