Bıylǵy 9 aıda 294 myń sharshy metr turǵyn úı paıdalanýǵa berilgen. Bıýdjet esebinen 66 úıdiń qurylysy júrgizilip jatyr. Jyl sońyna deıin 59 úıdi halyq ıgiligine berý josparlanyp otyr. Al jeke ınvestısııalar esebinen 46 úıdiń qurylysy bastalǵan. Odan bólek, jańadan salynatyn 800 páterli 20 turǵyn úı halyq ıgiligine sharshy metri 220 myń teńgeden nesıege beriletin bolady. Kezektegi azamattardy turǵyn úımen qamtamasyz etý maqsatynda 187 páterdi satyp alýǵa 1,8 mlrd teńge qarastyrylyp, qazirgi tańda memlekettik satyp alý konkýrsy ótip jatyr. О́ńirlik kommýnıkasııalar qyzmetinde ótken brıfıngte osyndaı derekter keltirgen Túrkistan qalasynyń ákimi Nurbol Turashbekov 3 679 azamat turaqty bos jumys oryndarymen qamtylǵanyn atap ótti. Sondaı-aq 535 jas túlek – «Jastar praktıkasymen», 102 jas – alǵashqy jumys ornymen, 175 azamat «Kúmis jas» jobasy aıasynda jumyspen qamtylǵan. Al 1 242 turǵyn aqyly qoǵamdyq jumys oryndaryna joldandy. Sonymen qatar 150 turǵynnyń bastapqy bıznes-josparlaryna qaıtarymsyz grant qarajaty berilgen. Túrkistan qalasyna bıyl 348,9 mlrd teńge kóleminde ınvestısııa tartý josparlansa, 9 aıdyń qorytyndysymen 245,8 mlrd teńgege jetken. «Qalada 2023 jyldyń 9 aıynda jalpy óńirlik ónim kólemi 222,7 mlrd teńgege jetip, ótken jylmen salystyrǵanda 15%-ǵa artyp otyr. Sondaı-aq bıyl ónerkásip salasynda 9 aıda 18,8 mlrd teńgeniń ónimi óndirilip, ósim 4,3%-dy qurady. Al ónerkásiptiń basym salasy óńdeý ónerkásibinde 12 mlrd teńgeniń ónimi óndirilse, elektrmen jabdyqtaý, gaz, bý berý kólemi 5,5 mlrd teńgege jetti», dedi Nurbol Ábdisattaruly.
Oblys ortalyǵynyń ózindik kiris kólemi 2023 jylǵa 19,4 mlrd teńge bolyp naqtylanyp, byltyrǵy kórsetkishten 28,5 paıyzǵa artqan. Sondaı-aq qala ákimi oblys ortalyǵyna keletin týrısterdiń qatary artqanyn aıtty. Mysaly, 9 aıda Túrkistan qalasyna 678,5 myń zııaratshylar men týrıster kelgen. Iаǵnı ótken jyldyń tıisti kezeńimen salystyrǵanda 3,1%-ǵa artqan. 6,7 myń sheteldik týrıst kelip, kórsetkish 24,1%-ǵa ósken. Oblys ortalyǵynda qonaqúıler sany búginde 57-ge jetti. Zııarat demekshi, kóktemde Túrkistan qalasyndaǵy Qoja Ahmet Iаsaýı kesenesiniń «qabyrǵalary quzdanyp, tuzy shyǵyp, buzylyp jatyr» degen aqparat qyzý talqyǵa túsken bolatyn. Ol boıynsha, ıaǵnı keseneniń jaǵdaıy bıliktiń, tıisti mekemelerdiń nazarynda ekenin «Egemen Qazaqstan» gazetinde «Kesene irgesiniń beriktigi mańyzdy» atty maqalamyzda jazǵan da bolatynbyz. Bul oraıda qala ákimi búginde kesene aýmaǵynda arnaıy komıssııa jumys istep jatqanyn aıtty. «Keseneniń negizgi jaǵynda rekonstrýksııa júrip jatyr. Ol boıynsha komıssııa qurylǵan. Qazir ylǵaldaný ár maýsymda qaı deńgeıde bolatyny zerttelýde. Máselen, keseneniń jaǵdaıy jaz, kúz, qysqy maýsymda jáne kóktemde qalaı bolady? Sodan keıin baryp qorytyndy shyǵady. Sol kezde ǵana naqty jaýap aıtylady», dedi qala ákimi.
О́zekti máseleler de joq emes, olardyń basym bóligi qala ákiminiń halyqpen kezdesýlerinde kóterilip, birtindep sheshimin taýyp keledi. Mysaly, oblys ortalyǵy Túrkistan qalasynda ortalyqtandyrylǵan káriz júıesine 13 601 abonent qana qosylǵan. Bul – jalpy qalanyń 32,2 paıyzy. Sarqyndy sý tazalaý ǵımaratynda bıotazalaý júıesi tolyq jumys atqarý úshin táýligine keminde 10 myń tekshe káriz sýy kelýi kerek. Qala aýmaǵy oramishilik abonenttik jelimen qamtamasyz etilmegendikten, bul ázirshe múmkin bolmaı otyr. Sebebi júrgizilgen sarqyndy sý jelileriniń basym bóligi – magıstraldy qubyrlar. Osy oraıda qala ákimi Túrkistandy sarqyndy sý júıesimen jáne abonenttik qosylymdarmen qamtamasyz etý maqsatynda 14 jobany júzege asyrý qajettigin aıtty. Qazirgi tańda 7 nysannyń qurylysy júrgizilip jatyr. Úsh nysan bıyl paıdalanýǵa berilmek. Tórteýiniń qurylysy bastalǵan. Jyl sońyna deıin sarqyndy sý jelisimen qamtamasyz etý kórsetkishin 36,3 paıyzǵa jetkizý josparlanǵan. Sonymen qatar 3 nysan respýblıkalyq bıýdjetke qarjylandyrýǵa usynylypty. Qala ákiminiń aıtýynsha, atalǵan jobalar tolyqtaı iske qosylǵan jaǵdaıda 2025 jylǵa qaraı qala aýmaǵyn káriz júıesimen qamtý kórsetkishi 95 paıyzǵa jetedi. Sondaı-aq jyl basynan beri qala ákimi 6 sektorda turǵyndarmen 96 ret kezdesip, ótinishterin tyńdaǵan. Ol kezdesýlerde 925 másele kóterilip, onyń 873-i oryndaldy. О́zge máseleler qarjy talap etýine baılanysty qalanyń damý josparyna engizilip, baqylaýǵa alynǵan.
TÚRKISTAN
