Biz alǵash barǵan «Altynarna Geosynthetic» kásiporny «2021-2025 jyldarǵa arnalǵan kásipkerlikti damytý jónindegi ulttyq joba» baǵdarlamasy boıynsha «Damý» qorynan nesıe somasynyń 50 paıyzyna kepildik túrinde qoldaý aldy.
– Biz «Damý» qorymen burynnan tyǵyz qarym-qatynasta jumys isteımiz. Sýbsıdııalaý men kepildik tetikterin paıdalanyp kelemiz. Sýbsıdııalanǵan nesıe arqyly ózimizge kerekti apparattar satyp aldyq. Qaramaǵymyzda birneshe zaýyt bar. Sonyń birinde jańa ónim shyǵarý úshin tehnıka jetkizdik. «Altynarna Geosynthetic» kompanııasy tutynýshylarǵa halyqaralyq standarttarǵa sáıkes keletin sapaly jáne senimdi geosıntetıkalyq materıaldardy usynady. Sonymen qatar ártúrli ınjenerlik jáne qorshaǵan ortany qorǵaý jobalary úshin ońtaıly sheshimderdi ázirleýge kómektesý arqyly óz tutynýshylaryna keńes beredi jáne tehnıkalyq qoldaý kórsetedi, – deıdi «Altynarna Geosynthetic» JShS quryltaıshysy Renat Mınhaırov.
«Altynarna Geosynthetic» JShS – joǵary sapaly geosıntetıkalyq materıaldardy óndirýge jáne jetkizýge mamandanǵan jetekshi kompanııanyń biri. Geosıntetıka – qorshaǵan ortany qorǵaý, topyraqtyń geotehnıkalyq qasıetterin jáne ınjenerlik qurylymdardyń beriktigin jaqsartý úshin qoldanylatyn zamanaýı materıal. «Altynarna Geosynthetic» geomembrana shyǵarady.
«Bul – gıdrooqshaýlaý, ylǵal men hımııalyq zattardyń enýine jol bermeý úshin qoldanylatyn plastıkalyq polımerli plenka. Geotekstıl bolsa, topyraqty nyǵaıtý, sýdy súzý jáne erozııany boldyrmaý úshin qoldanylatyn materıal. Al geotor – topyraqty nyǵaıtý, betkeılerdiń turaqtylyǵyn qamtamasyz etý jáne topyraqtyń jyljýyn boldyrmaý úshin qoldanylady», deıdi kásiporyn basshysy.
Kepildikten bólek «Damý» qory kásipkerlerge nesıe alǵanda paıyzyn jeńildetip qoldaý kórsetedi. Bıylǵy bul kórsetkish 7 paıyzdy qurapty. «Shaǵyn jáne orta kásipkerlik sýbektilerin óńirlik qarjylandyrý» baǵdarlamasy aıasynda «Kásipker» jobasymen kómekke ıe bolǵan «Invictus Karaganda» JShS sport klýby búginde órken jaıǵan.
– «Invictus Karaganda» JShS – úlken sporttyq nátıjelerdi damytýǵa jáne qol jetkizýge arnalǵan alań. Biz 2023 jyldyń aqpan aıynda ashyldyq. «Damý» qorynan 50 mln teńge nesıe aldyq. Bul qarajatty fıtneske arnalǵan zattarǵa jumsadyq. Osy zaldaǵy trenajerlerdiń birazy sol aqshaǵa alyndy. «Invictus» ataýy latyn tilinen aýdarǵanda «jeńilmeıtin» degendi bildiredi. Klýb sporttyń ár salasynda ártúrli jattyǵý men baǵdarlamany usynady. Ár sportshyǵa kásibı qoldaý kórsetedi, olardyń jetistikke jetýine atsalysady. Munda arnaıy mamandar jumys isteıdi. Jıyrmadan astam jattyqtyrýshymyz bar, – deıdi «Invictus Karaganda» JShS basshysy Dmıtrıı Berdnıkov.
«Damý» qorynyń qoldaýyn sezingen kóp bıznes mekemeleriniń ekeýi – osy. Qor qurylǵan kezden bastap, elde jalpy nesıe somasy 11,4 trln teńge bolatyn 197 myńǵa jýyq bıznes-jobany qoldaǵanyn aıtady aımaqtyq fılıal dırektory Áset Tilemisov.
– Kásipkerlikti yntalandyrý el ekonomıkasy damýyna yqpal etedi. Memleket tarapynan qoldaý kórsetýdiń nátıjesinde otandyq taýarlar men qyzmetter óndirisi damyp, halyqty jumyspen qamtyp, taýar ımporty azaıa bastady, – deıdi aımaqtyq fılıal dırektory Áset Tilemisov.
Bıznesti qoldaý jáne damytý baǵdarlamalary iske qosylǵan kezden beri, oblysta kásipkerlerdiń 356 mlrd teńge bolatyn 5 974 jobasy sýbsıdııalanyp, 3 424 joba «Damý» qorynan 48 mlrd teńgelik kepildik alǵan.
– Al bıylǵy jyldyń basynan beri 393 joba 24 mlrd teńgege sýbsıdııalansa, 349 joba 5,3 mlrd teńgelik kepildik aldy, – deıdi fılıal dırektory.
Jaqynda qor oblystaǵy kásipkerlerdi jeńil nesıemen qarjylandyrý maqsatynda «Kásipker» atty óńirlik baǵdarlamany iske qosty. Osy baǵdarlama aıasynda «SentrKredıtBankke» 200 mln teńge salynypty. Ol qarjyny baǵdarlama sharttary boıynsha Qaraǵandy oblysynda bıznesin tirkep, jumys istep jatqan shaǵyn jáne orta bıznes ókilderi jeńildetilgen nesıe retinde alady. Bir kásipkerge 50 mln teńgege deıin beriledi. Nesıe – ınvestısııa, aınalym qarajatyn tolyqtyrýǵa jumsalýǵa tıis. Nesıe merzimi – 5 jylǵa deıin. Jyldyq mólsherlemesi – 7%. Mundaı jeńil nesıe alý úshin kásipker ekonomıkanyń basymdyq berilgen salalarynda qyzmet etýge tıis degen talap bar.
Qaraǵandy oblysy
