Ol aıaǵya jasalǵan otadan keıin qatty álsirep ketkenin, arada bir apta ótpeı qos ókpesi aýyrsyna bastaǵanyn jetkizgen.
"Dúrkin-dúrkin kóterilgen qyzý men jótel sharshatyp-aq tastady. Taǵy sol emhanaǵa telefon shalyp, terapevttiń qabyldaýyn suradym. Olar bul aptaǵa oryn joq dedi. "Qalqam, jaǵdaı osyndaı bolyp tur". "Men kómektese almaımyn". Amal joq bólim meńgerýshisine bardym, ol bir dárigerge jiberedi. Ol tyńdap kórip, "Sizde pnevmonııa joq" dep, birer dári jazyp berdi. Olardan kómek bolmady, tynys alý qıyndap barady", degen avtor.
Sodan soń derti shydatpaı bara jatqan soń, jedel járdem shaqyrǵan, olar ekinshi qalalyq aýrýhanaǵa aparyp tastaǵan.
"Jerdiń túbi eken. Kezegim kelgende rentgenge túsirip, olar da "Sizde pnevmonııa joq, sondyqtan sizdi jatqyza almaımyz. Tórtinshi aýrýhanaǵa baryp kórińiz, óz aýdanyńyz, solar emdeýge mindetti" dedi. Súıretilip sonda keldim, olar "Bizde ókpe emdeıtin bólim joq, Qalqamanǵa baryńyz" dedi. Aýyryp áliń ketip turǵanda júrý qandaı aýyr, úıge jettim de quladym. Áıel jumysta, balalar jan-jaqqa habarlasyp, keńes suraı bastady", dep jazǵan Nurtaı Ernazar.
Oǵan tanystarynyń biri shuǵyl túrde KT túsirýge keńes beredi.
"Japparqulda jan bar ma, oǵan da bardyq. Ondaǵy jigit "Aǵa, oń jaq ókpeniń bir bóligi ǵana saý, qalǵanyn túgel alyp qoıǵan, shuǵyl em almasańyz kesh bolady" dedi. Taǵy jedel járdem shaqyrdyq. Olar Qalqamandaǵy pýlmonologııa ortalyǵyna jetkizdi. Jol mundaı uzaq bolar ma, keshki keptelis jedel járdemdi de tutqyndap tastaıdy eken. Aýrýhanaǵa jete almaı talaı adam kóz jumǵan shyǵar-aý dep te oılap qoıam. Baqsaq, bul da bir sheshýin tappaı kele jatqan problema eken ǵoı. Aýrýhanaǵa jetkende júrýden qaldym, ary qaraı arbamen alyp ketti. Murynǵa kıslorod shlangasyn tyǵyp jiberip, tamyrdan tamshylatyp sýara bastady. Qoıshy, ne kerek, sodan on bes kún degende qyzý basyldy, qybyrlap júre bastadym", deıdi avtor.
Onyń oıynsha, eger áý basta anda-mynda áýre qylmaı birden osynda jiberse, anaǵurlym jeńil bolǵandaı eken.
"KT túskenge deıingi apparattar jaman ba, álde dárigerler rentgendi durys oqı almaı ma, sizde eshteńe joq dep sendirdi ǵoı, biraq nátıje kerisinshe bolyp shyqty", - dep tańdanady aqyn.
Ol koronavırýs kezinde myqty sportshy jigitterdiń bir-eki kúnde dertten qaıtys bolyp ketkenin esine alady.
"Osy joly óz basymnan ótkizip baryp kózim jetkendeı boldy. О́kpe durys jumys istemegen soń aǵzaǵa ottegi jetpeı qozǵalýǵa shama kelmeı qalady eken.
Naqty emdeıtin jerge jetkenshe kedergi nege kóp? Biraq ótkende mınıstr hanym osy júıe durys degendeı qyldy ǵoı. Aıtaıyn degenim óz jaǵdaıym emes, osy jaǵdaıdy bastan keship jatqan kóptiń birimin ǵoı, myna júıeniń osylaı jalǵasa bergeni durys pa, álde jańa utymdy tásilder qajet pe? Ozyq elderden tıimdi bir júıeni urlap alsaq ta myna jaǵdaıdy ózgertý kerek shyǵar? Aqyldy halyq artta qalǵan júıemen jumys isteı me?", dep kúıingen kóz jumarynyń aldynda Nurtaı Ernazar.
Degenmen ol aýrýhana dárigerlerine alǵysyn aıtyp úlgergen. Olarǵa tabys tilegen.
"Búgin úıime kep rahattanyp qaldym, qara dombyramdy da saǵynyppyn. Biraq bir aıǵa deıin úıden shyǵýǵa, qonaq qabyldaýǵa tyıym salyndy. Bul kún de óter. Aýyrmańyzdar", dep aıaqtalady aqynnyń sońǵy jazbalarynyń biri.
